"ჩვენი ვიზიტი აფხაზეთში პოლიტიკასთან დაკავშირებული არ არის, მას ღრმად ეკონომიკური ინტერესები აქვს. ეს განცხადება სოხუმში ვიზიტად მყოფმა ებრაული დელეგაციის წევრმა ისრაელის შეიარაღებული ძალების გენშტაბის ოპერატიული სამმართველოს ყოფილმა ხელმძღვანელმა ისრაელ ზივმა სეპარატისტული აფხაზეთის ე.წ. პრემიერ-მინისტრთან სერგეი შამბასთან შეხვედის დასრულების შემდეგ გააკეთა.
"ჩვენ დავინახეთ ქვეყანა, რომელიც ცდილობს ომის შედეგებს თავი დააღწიოს. ყველაზე მეტად ჩვენზე შთაბეჭდილება მოახდინა თქვენი ხალხის სწრაფვამ განავითარონ საკუთარი ქვეყანა", _ განაცხადა ზივმა.
ებრაული დელეგაცია, რომელსაც ჰოლდინგ "Global CST"-ის უფროსები - ისრაელის შეიარაღებული ძალების გენშტაბის ოპერატიული სამმართველოს ყოფილი ხელმძღვანელი ისრაელ ზივი და მოქმედი პრემიერის ყოფილი სახედრო მდივანი მეირ კლიფი ხელმძღვანელობენ აფხაზეთში გუშინ, მოსკოვში აფხაზ სეპარატისტთა ლიდერთან სერგეი ბაღაფშთან გამართული შეხვედრის შემდეგ ჩავიდა და 15 აპრილამდე დარჩება.
აფხაზური მხარე ასევე იუწყება, რომ ისრაელის დელეგაცია აფხაზეთში კვლავ დაბრუნდება, მას შემდეგ რაც მიღებულ იქნება გადაწყვეტილება თანამშრომლობის შესახებ იმ სფეროებში რომელთა განხილვა აფხაზურ მხარესთან მოხდა.
