ფრაქცია "ჩვენი თბილისის" წევრი ვიქტორ დოლიძე სოციალური თავშესაფრის მთხოვნელ მოქალაქეთა პრობლემის დაუყოვნებლივ გადაჭრას მოითხოვს.
როგორც დღეს გამართულ ბრიფინგზე ვიქტორ დოლიძემ აღნიშნა, საქართველოში სოციალური თავშესაფრის მთხოვნელ მოქალაქეთა რიცხვი მაღალი ტემპით იზრდება. ქვეყანას კი ამ ტენდენციის შემაკავებელი მექანიზმი არ გააჩნია.
ამ პრობლემის გამო "თავისუფალმა დემოკრატებმა" 11 მარტს შესაბამისი წერილით მიმართეს ქალაქის მერს, სადაც ოპოზიციურ პარტიათა მონაწილეობით მიზნობრივი პროგრამის შემუშავება ითხოვეს. თუმცა ქალაქის მერისგან პასუხი არ მიუღიათ.
"თავისუფალი დემოკრატების" მიერ ლობირებული უმწვავესი საკითხი დაფიქსირებულია სახალხო დამცველის ანგარიშშიც. კერძოდ, თბილისში თავშესაფრის მაძიებელთა რიცხვი 4884 ოჯახია, ქუთაისში_351, ბათუმში_78 და ა.შ",_აცხადებს ვიქტორ დოლიძე.
დოლიძე დაუშვებლად მიიჩნევს, რომ დედაქალაქში 4884 თავშესაფრის ოფიციალურად რეგისტრირებული ოჯახიდან 2010 წელს მხოლოდ 24 ოჯახი დაკმაყოფილდა ბინით, ხოლო 2011 წელს კი დაგეგმილია 26 ოჯახის დაკმაყოფილება.
"დღევანდელი მექანიზმი უპასუხისმგებლობის კლასიკური ნიმუშია და არ ითვალისწინებს ადგილობრივი მმართველობისა და თვითმმართველობის კანონით დელეგირებული უმთავრესი ვალდებულების შესრულებას, რაც მოქალაქეთა თავშესაფრით უზრუნველყოფას გულისხმობს",_აღნიშნავს საკრებულოს ოპოზიციონერი წევრი.
ვიქტორ დოლიძის დღევანდელ განცხადებას დღესვე უმრავლესობის წევრი გამოეხმაურა. როგორც საკრებულოს საფინანსო-საბიუჯეტო კომისიის თავმჯდომარემ_ თამაზ შოშიაშვილმა აღნიშნა, უბინაოთა დაკმაყოფილების საკითხში დედაქალაქის მერიას მკაფიო პოზიცია აქვს და კონკრეტული საკითხის შესწავლის საფუძველზე, სოციალურად დაუცველებს პრობლემის მოგვარებაში ეხმარებიან.
"ჩვენი ხელისუფლების პირობებში დაიწყო სოციალური სახლების მშენებლობა. ამ სახლების მშენებლობის დროს ბალტიისპირეთის, სკანდინავიის გამოცდილების მაგალითით ვხელმძღვანელობთ. ამ კატეგორიის ადამიანებისთვის ავაშენეთ 6 მრავალბინიანი სოციალური სახლი. წელს კი დედაქალაქს ორი მრავალბინიანი სოციალური სახლი შეემატება. წლეულს სოციალური სახლებით 36 ოჯახი დაკმაყოფილდება",_აცხადებს შოშიაშვილი.
მისი თქმით, დედაქალაქის ხელმძღვანელობა ზედაპირულ რჩევებს არ საჭიროებს.
"იმ ოჯახებს შორის, რომლებიც ბინებით დაკმაყოფილებას მოითხოვენ, ყველას არ ეკუთვნის სოციალური სახლები. ჩვენი უმთავრესი მიზანია, პირველ რიგში, ის მოსახლეობა დავაკმაყოფილოთ ბინებით, რომელთა სოციალური ფონიც დამძიმებულია",_აცხადებს შოშიაშვილი.