სუამ-ის წევრი სახელმწიფოები ერთობლივი ტურისტული პროდუქტების შექმნაზე იწყებენ მუშაობას. ერთობლივი პროდუქტის სამიზნე ბაზრად კი იაპონია მოიაზრება, რომელშიც აქტიურად ჩაერთვება ტურ-ოპერატორი Vanilla sky და ის საქართველოს ინტერესებს დაიცავს და შეეცდება ქვეყანაში რაც შეიძლება მეტი იაპონელი ტურისტი შემოიყვანოს.
თბილისი სუამ-ის წევრი ქვეყნების ტურიზმის საკითხებზე მომუშავე ჯგუფის უწყებათა წარმომადგენლების. ორ დღიან შეხვედრას მასპინძლობს, სადაც ერთობლივი ტურისტული პროდუქტების შექმნაზე და მის სავარაუდო ტარიფებზე იმსჯელებენ.
სუამ-ის წევრი ქვეყნების ტურიზმის საკითხებზე მომუშავე ჯგუფს წელს საქართველო მასპინძლობს. შეხვედრის, ფარგლებში, რომელიც დღეს სასტუმრო "რადისონში" გაიმართა, იგეგმება ე.წ. თბილისის დეკლარაციაზე ხელის მოწერა, რომლითაც განისაზღვრება სუამ-ის ქვეყნების ერთიანი ტურისტული პროდუქტების განვითარების მიმართულებები.
სუამ-ის გენერალური მდივანი ვალერი ჩეჩელაშვილი აცხადებს, რომ თბილისის დეკლარაცია 11 პუნქტს მოიცავს, საიდანაც მნიშვნელოვანი მაინც ერთობლივი ტურისტული პროდუქტების შექმნაა.
"ტურიზმი - ეს არის ერთ-ერთი მნიშვნელოვანი ფორმატი სუამ-ის წევრი ქვეყნების თანამშრომლობაში. ტურიზმის სფეროში, ანალოგიური შეხვედრა 2 წლის უკან, ბაქოში შედგა, სადაც მიღებული იქნა ბაქოს დეკლარაცია და შესაბამისი სამოქმედო გეგმა. თუმცა ძირითადი პუნქტები იმ დეკლარაციიდან შესრულებულია და იმედი მაქვს, რომ დღეს დიალოგი შედგება. მნიშვნელოვანია ასევე იაპონელი სპეციალიტების ჩართვა ამ პროექტის შექმნაში"- აცხადებს ვალერი ჩეჩელაშვილი.
დღესვე სუამ-ის წევრი ქვეყნების ტურიზმის საკითხებზე მომუშავე ჯგუფი, იაპონიიდან პრეს-ტურების მოწვევაზე იმსჯელებს, რათა ერთობლივი პროდუქტი იაპონიაში გახდეს პოპულარული და გაყიდვადი. ვალერი ჩეჩელაშვილი ამბობს, რომ სუამ-ის წევრი სახელმწიფოების ერთობლივი ტურისტული პროდუქტები იაპონელებისათვის იქნება ძალზედ მიმზიდველი.
"იაპონელი ტურისტი არის სერიოზული ტურისტი. ქვეყნიდან ყოველწლიურად 20 მლნ. ტურისტი გამოდის. ჩვენ გვაქვს უპირატესობა, რადგან ვართ 4 მეგობრული ქვეყანა, განსხვავებული ისტორიითა და დიდი ტურისტული პოტენციალით. ამიტომ ჩვენ ოთხნი უფრო მიმზიდველი ვიქნებით იაპონელი ტურისტებისათვის"- აღნიშნა ვალერი ჩეჩელაშვილმა სააგენტო "ჯი-ეიჩ-ენთან" საუბრისას.
ტურიზმის ეროვნული სააგენტოს ხელმძღვანელი მაია სიდამონიძე ამბობს, რომ სუამ-ის წევრი ქვეყნების ტურიზმის საკითხებზე მომუშავე ჯგუფის შეხვედრაზე აქცენტი ერთობლივი ტურისტული პროდუქტების გარდა ამ პროდუქტის გაყიდვის გზებზე და მარკეტინგულ კამპანიაზეც გაკეთდება.
"შეხვედრის ფარგლებში, თბილისის დეკლარაცია გაფორმდება და დაიდება ერთობლივი სამოქმედო გეგმა, სადაც მთავარი აქცენტი ერთობლივი პროდუქტების შემუშავებაზე გაკეთდება. ამის შემდეგ კი დავიწყებთ ამ ერთობლივი პროდუქტების პოპულარიზაციას. ერთობლივი პროდუქტის ფარგლებში შეიქმნება ერთობლივი ტურისტული პაკეტები და ტურისტს საშუალება მიეცემა ერთდროულად იმოგზაუროს, როგორც საქართველოში ასევე აზერბაიჯანში, მოლდოვასა და უკრაინაში. მიმაჩნია, რომ ესეთი ტურისტული პროდუქტი იქნება გაყიდვადი.
ერთ-ერთი მნიშვნელოვანი ბაზარი, რომელზედაც ვიმუშავებთ არის იაპონია. შეხვედრაზე განვიხილავთ, იაპონიის მიმართულებით თუ როგორი სამოქმედო გეგმა უნდა ავამოქმედოთ. განიხილება ასევე ინფო-პრესტურების მოწყობა და ინვესტიციების მოზიდვის საშუალებები. ამ მიმართულებით კი იაპონიის მთავრობიდან დიდი მხარდაჭერა გვაქვს"- აღნიშნა მაია სიდამონიძემ.
დღესვე, სუამ-ის წევრი ქვეყნების ტურიზმის საკითხებზე მომუშავე ჯგუფი ბათუმში გაემგზავრება, სადაც აჭარის მთავრობის ხელმძღვანელს შეხვდება.