თბილისის მერმა გიგი უგულავამ ხუთშაბათს თბილისის ცენტრში მაღალტექნოლოგიური სამაცივრე მეურნეობა გახსნა.
სამაცივრე მეურნეობა ჰოლდინგში "საქართველოს ინდუსტრიული ჯგუფი" შემადგენლობაში შემავალი შპს "დიდუბის მარკეტის" საკუთრებაა. მეურნეობა 3,5 თვეში აშენდა და სამუშაობში 1,5 მილიონი ლარის ინვესტიცია ჩადო. ბიზნესში 20 ადამიანია დასაქმებული, საიდანაც 5 მერიის დასაქმების პროგრამიდან შეირჩა.
სამაცივრე მეურნეობა იტალიური კომპანია "ტექნო ბლოკის" დანადგარებითაა აღჭურვილი, მოპირკეთებულია ანტიბაქტერიული ინდუსტრიული იატაკით, რაც სურსათის უვნებლობის გარანტიას იძლევა.
"დიდუბის მარკეტის" სერვისით ისარგებლებენ სურსათის მწარმოებელი და იმპორტიორი წამყვანი კომპანიები. ისინი პროდუქციას შესაბამის სამაცივრო საკნებში შეინახავენ და ადგილიდან ივაჭრებენ, რითაც მნიშვნელოვნად დაზოგავენ ხარჯებს. საბოლოოდ ეს პროდუქციის ფასს მნიშვნელოვნად შეამცირებს.
"დიდუბის მარკეტი" უკვე შეუთანხმდა საქართველოში მოქმედ სურსათის მწარმოებელ და იმპორტიორ წამყვან კომპანიებს ("ახალი პროდუქტი", "თეთრი ქუდი", "ფორა", "ვიტა ფრუიტი" და სხვა) ექსკლუზიურად დაბალი ფასებით ვაჭრობაზე.
"დიდუბის მარკეტის" ტერიტორია აღჭურვილია დაცვის და კონტროლის ყველა თანამედროვე სისტემით.
