ცენტრალური საარჩევნო კომისია განაგრძობს საარჩევნო გარემოს გაუმჯობესების ხელშეწყობას და საინტერესო სამოქალაქო ინიციატივების მხარდაჭერას საქართველოს რეგიონებში.
წლის ბოლომდე, საქართველოს ყველა რეგიონში, ცესკოს ინიციატივითა და გაეროს განვითარების პროგრამის მხარდაჭერით, გაიხსნება 16 რეგიონული რესურს-ცენტრი. ამ ინიციატივის მიზანია რეგიონებში ისეთი გარემოს შექმნა, სადაც არჩევნებში ჩართულ მხარეებს - საარჩევნო სუბიექტებს, მედიას, დაგილობრივი არასამთავრობო და საერთაშორისო ორგანიზაციებს ექნებათ საშუალება შეხვდნენ ამომრჩევლებს, ჩაატარონ ტრენინგები და განახორციელონ სხვადასხვა ღონისძიებები.
ყოველი რესურს-ცენტრი სამოქალაქო განათლების ერთგვარ კერად იქცევა, სადაც ამომრჩევლები მონაწილეობას მიიღებენ სხვადასხვა საინტერესო პროექტებში და ასევე წახალისდებიან საკუთარი სამოქალაქო ინიციატივების განსახორციელებლად.
ამომრჩევლებს ასევე ექნებათ შესაძლებლობა გამოიყენონ ელექტრონული და წიგნების ბიბლიოთეკა.
ცესკო, ასევე რეგიონების საოლქო საარჩევნო კომისიების რესურსების განვითარებაზეც მუშაობს. კომუნიკაციისა და ინფორმაციის გაცვლის გაუმჯობესების მიზნით, საარჩევნო ადმინისტრაცია საოლქო საარჩევნო კომისიებისათვის ერთიან კომპიუტერულ ქსელს შექმნის. ამ ეტაპზე ოლქები ერთმანეთსა და ცენტრალურ საარჩევნო კომისიას ინტერნეტის საშუალებით უკავშირდებიან, ხოლო სამომავლოდ შიდა ქსელი შეიქმნება, რომლითაც მათ საშუალება ექნებათ სწრაფად და უსაფრთხოდ გაცვალონ ინფორმაცია. ქსელი დაცული იქნება უსაფრთხოების თანამედროვე სტანდარტების შესაბამისად.
საარჩევნო გარემოს გაუმჯობესებაზე ზრუნვა სხვადასხვა მიმართულებით მიმდინარეობს. 2011 წელს საარჩევნო ადმინისტრაცია ხელს შეუწყობს საარჩევნო გარემოს გაუმჯობესებას, როგორც სამოქალაქო განათლების პროექტების განხორციელებით, ასევე რეგიონების გააქტიურებითა და სოციალური მედიის მხარდაჭერით.