საქართველოს პედაგოგთა და მეცნიერთა თავისუფალ პროფკავშირებში ცვლილებები ჯერჯერობით არ დაწყებულა. ამის შესახებ პროფკავშირების პრეზიდენტის მაია კობახიძის განცხადებაშია ნათქვამი.
"პროფკავშირებში მდგომარეობის გამოსწორების მიზნით სერიოზული ცვლილებები ჯერჯერობით არ დაწყებულა. განათლებისა და მეცნიერების სამინისტრო იმ მოტივით, რომ მიმდინარეობს სასამართლო პროცესი, შემხვედრ ნაბიჯებს არ დგამს. სპმთპ -სა და მასთან დაპირისპირებული მხარის სასამართლო მოსამზადებელი სხდომა საქმეზე 17 მარტს გაიმართა, რომელიც ჩვენთვის გაურკვეველი ვადით გადაიდო. ვფიქრობთ, სასამართლო პროცესის გაჭიანურებით დაინტერესებული ძალები ცდილობენ შეინარჩუნონ ორგანიზაციაში დაძაბული მდგომარეობა. დაპირისპირებული მხარე არ ცვლის თავის პოზიციებს და უარს აცხადებს კონსტრუქციულ დიალოგზე", - ნათქვამია განცხადებაში.
კობახიძე მიიჩნევს, რომ განათლებისა და მეცნიერების სამინისტრო "თავისი ქმედებებით" არღვევს ქვეყნის შიდა კანონმდებლობისა და საერთაშორისო სამართლებრივი აქტების მოთხოვნებს, რამაც თავისი ასახვა პოვა ამერიკის შეერთებული შტატების სახელმწიფო დეპარტამენტის ანგარიშში.
მათი დასკვნით: მიუხედავად იმისა, რომ საქართველოს კონსტიტუციით გარანტირებულია გაერთიანების თავისუფლება, სახელმწიფო ყოველთვის არ იცავს ამ უფლებას პრაქტიკაში.
"ამერიკის მშრომელთა ოგანიზაციისა და ინდუსტრიულ ორგანიზაციათა კონგრესის მონაცემების მიხედვით, 8 ივნისს განათლების მინისტრი დიმიტრი შაშკინი შეხვდა რეგიონალური ორგანიზაციების წარმომადგენელებს და სკოლის დირექტორებს, სადაც მან ზეპირი ბრძანება გასცა, რომ ყველა სკოლის დირექტორს შეეჩერებინა მასწავლებლეთა პროფკავშირისთვის საწევროების გადარიცხვა. შედეგად სპმთპ-ს ადგილობრივმა თავჯდომარეებმა დაიწყეს საწევროების შეგროვება პირდაპირ წევრებიდან. ამ სიტუაციის შეტყობისთანავე განათლების მინისტრამა განაცხადა, რომ ის დირექტორი ვინც ნებას დართავდა ასეთ აქტივობას სკოლაში, პასუხს აგებდა კანონის წინაშე. მინისტრის 30 ნეომბრის განცხადებით სკოლის ადმინისტრაციებს მოეთხოვათ, რომ ჰქონოდათ მოსწავლებლების წერილობითი თანხმობა, ასევე სკოლებსა და სპმთპ-ს შორის გაფორმებული კოლექტიური ხელშეკრულებები საწევროების გადარიცხვის თაობაზე.
სპმთპ-ის განცხადებით, ყოველივე ამ საბუთების მოწესრიგების შემდეგაც კი შეუძლებელი იყო საწევროების მიღება სკოლების მხრიდან.
"საქართველოს განათლებისა და მეცნიერების მინისტრი არ ხვდება სპმთპ-ის ახალადარჩეულ პრეზიდენტს მაია კობახიძეს და უარს აცხადებს მასთან დიალოგის წარმოებაზე. მანდატურების ინსტიტუტი შექმნა სამინისტრომ იმისათვის, რომ უზრუნველეყო სკოლის დაცვა. ისინი აჭარბებენ მათ უფლებამოსილებას. მანდატურები პასუხისმგებელნი არიან სამინისტროს წინაშე. ისინი ადგენენ აქტებს, რომელსაც სამინისტროს ოფიციალური პირები იყენებენ მასწავლებელთა სამსახურიდან გათავისუფლების საფუძვლად. კანონის თანახმად, პროფესიული კავშირის დაფუძნება შეიძლება სულ ცოტა 100 პირის ინიციატივით. შრომის საერთაშორისო ორგანიზაციის ექსპერტთა კომიტეტის მიერ კანონის აღნიშნული მოთხოვნა მიჩნეულ იქნა არაგონივრულად", - ნათქვამია განცხადებაში.
მათი განცხადებით, ქართული კანონმდებლობა ითვალისწინებს პროფესიული კავშირის საქმიანობის შეჩერებას სასამართლოს მიერ, თუკი პროფკავშირი ხელს უწყობს სოციალური კონფლიქტის გაღვივებას. ეს დებულება შესაძლებელია არასწორად იყოს გამოყენებული და აიკრძალოს კანონიერი პროფკავშირის საქმიანობა.კოლექტიურ მოლაპარაკებები გათვალისწინებულია კანონით. სახელმწიფო კი ხშირად არ იცავს კოლექტიური მოლაპარაკებების უფლებას პრაქტიკაში.
"შრომის კოდექსის მნიშვნელოვანი ხარვეზი მდგომარეობს იმაში, რომ შრომითი ურთიერთობის შეწყვეტისას დამსაქმებელს არ ეკისრება ვალდებულება შრომითი ურთიერთობის შეწყვეტის მიზეზის დასახელებისა." საქართველოს შრომის კოდექსი არ იცავს ორსულ ქალებს სამსახურიდან გათავისუფლებისაგან, მაშინ, როდესაც ისინი არიან დეკრეტულ შვბულებაში", - აცხადებს კობახიძე.
მისი თქმით, საქართველოს განათლებისა და მეცნიერების სამინისტროს არაკანონიერ ქმედებებზე, რომელმაც ორგანიზაცია კრიზისამდე მიიყვანა, პროფკავშირებმა საქართველოს პარლამენტის თავმჯდომარე დავით ბაქრაძეს წერილით მიმართეს.
"იმედს გამოვთქვამთ, განათლებისა და მეცნიერების მინისტრი გაითვალისწინებს ამერიკის შეერთებული შტატების სახელმწიფო დეპარტამენტის დასკვნას და ასევე ველოდებით ქმედით დახმარებას საქართველოს პარლამენტის თავმჯდომარის მხრიდან", - დასძენს კობახიძე.
