14 აპრილს, 11:00 საათზე, ფინანსთა სამინისტროს შემოსავლების სამსახურში აღსრულების ეროვნულ ბიუროსა და შემოსავლების სამსახურს შორის ურთიერთთანამშრომლობის მემორანდუმი გაფორმდება. მემორანდუმს ხელს მოაწერენ აღსრულების ეროვნული ბიუროს თავმჯდომარე - ნიკა მელია და შემოსავლების სამსახურის უფროსი - ჯაბა ებანოიძე.
ხელშეკრულების თანახმად, 2011 წლის მაისიდან აღსრულების ეროვნული ბიურო შემოსავლების სამსახურიდან მიღებული ადმინისტრაციულ-სამართლებრივი აქტის საფუძველზე განახორციელებს აღნიშნული აქტით გათვალისწინებულ გადასახადის გადამხდელის ქონებაზე ყადაღის დადების პროცედურებს. 2010 წლის დეკემბრამდე აღნიშნულ ფუნქციას შემოსავლების სამსახურის იძულებით ღონისძიებათა სამმართველო ასრულებდა.
ხელშეკრულებით გათვალისწინებული მოვალეობის შესასრულებლად აღსრულების ეროვნული ბიუროს ტერიტორიულ ორგანოებში ახალი, საგადასახადო საქმეთა ოფიცრის თანამდებობა შეიქმნება. აღნიშნულ თანამდებობებზე დასასაქმებლად, აღსრულების ეროვნულმა ბიურომ კონკურსის წესით საქართველოს მასშტაბით 51 ადამიანი უკვე შეარჩია.
აღსრულების ეროვნული ბიუროს საგადასახადო საქმეთა ოფიცრები ხელშეკრულებით გათვალისწინებული მოვალეობის შესრულებას ურთიერთთანამშრომლობის მემორანდუმის გაფორმებისთანავე დაიწყებენ.
