საქართველოს პრეზიდენტი მიხეილ სააკაშვილი მთავრობის მიერ ახალი ფასიანი ქაღალდების გამოშვებას "წარმატებულ ნამუშევრად" აფასებს.
ქვეყნის პირველმა პირმა საქართველოს სახელმწიფო ვალების გადავადების დეტალებზე ანგარიში დღეს თავად პრემიერ-მინისტრ ნიკა გილაურისგან ჩაიბარა.
"მთავრობის მიერ ძალიან წარმატებული რამ განხორციელდა. პრაქტიკულად, მოხდა საქართველოს სახელმწიფო ვალის გადავადება ძალიან დიდი ვადით და 2013 წელს ჩვენ არ გვექნება ვალის ძირითადი ნაწილი გადასახდელი, რაც ნიშნავს იმას, რომ შეგვიძლია ფული დავხარჯოთ ქვეყნის განვითარებაზე, ჩვენი ხალხის სოციალურ-ეკონომიკური პირობების გაუმჯობესებაზე", - განაცხადა საააკშვილმა ნიკა გილაურთან შეხვედრაზე.
ამასთან, პრეზიდენტის შეფასებით, "მოსალოცი საქმეა" ის, რომ საერთაშორისო ინვესტორებმა საქართველოს ევრობონდების გამოშვების კუთხით ნდობა გამოუცხადეს.
"მართლაც მოსალოცადაა საქმე, რადგან ძალიან დიდი ნდობა გვაქვს საერთაშორისო ინვესტორების, თან იმ ფონზე, როცა საბერძნეთი ეკონომიკა ჩამოიშალა, პორტუგალიაშიც სერიოზილი პრობლემებია, ირლანდიას, ისლანდიას და ასეთ ქვეყნებს აღარ ენდობა ინვესტორების უმეტესობა. ამ რთულ ფონზე ის, რომ საქართველომ მოახერხა ვალის გადავადების წარმატებით განხორციელება და საკრედიტო რესურსის გაგრძელება, მართლაც ძლაიან კარგი ნამუშევარია", - აღნიშნა სააკაშვილმა.
ქვეყნის პირველი პირის თქმითვე, ვალის გადახდა, რომელიც მთავრობამ 2021 წელს უნდა უზრუნველყოს, "საქართველოს განვითარებიდან გამომდინარე არ გაგვიჭირდება".
შეგახსენებთ, რომ საქართველოს მთავრობამ ევრობონდების ახალი ემისია განახორციელა, რის შედეგადაც 2013 წლისთვის დასაფარი ვალის 2021 წლამდე გადავადება მოახდინა.
