საპარლამენტო უმცირესობის ლიდერის, გიორგი თარგამაძის შეფასებით, საქართველოს პოლიტიკური სისტემა რუსეთის პოლიტიკურ სისტემას ემსგავსება.
ამის შესახებ გიორგი თარგამაძემ ევროსაბჭოს საპარლამენტო ასამბლეის სესიაზე სიტყვით გამოსვლისას განაცხადა და აქვე აღნიშნულს "საშიში" ტენდენცია უწოდა.
"ბევრისგან მსმენია, რომ საქართველოს ემუქრება რუსეთის გავლენის სფეროში დაბრუნება და რომ თბილისიდან 35 კილომეტრში რუსული ტანკების განლაგება ქვეყნის დემოკრატიულ პერსპექტივებს ბოლოს მოუღებს. რუსეთის მძიმე არტილერიის საქართველოს დედაქალაქთან ასე ახლოს განლაგება მართლაც ძალიან სახიფათოა, თუმცა არანაკლებ საშიშია ის, რომ საქართველოს პოლიტიკური სისტემა რუსულ პოლიტიკურ სისტემას ემსგავსება", - განმარტა მან.
ამასთან, გიორგი თარგამაძის აზრით, როგორც საქართველოს, ისე რუსეთის მომავალი დემოკრატიულ და სტაბილურ განვითარებაზეა დამოკიდებული.
ამასთან, საპარლამენტო უმცირესობის ლიდერმა საქართველოში დემოკრატიის ხარისხზეც ისაუბრა და აღნიშნა, რომ დროა, ქვეყანაში დემოკრატიამ ზრდასრულობას მიაღწიოს.
"საქართველოს აღარ აქვს ახალგაზრდა დემოკრატიის კურსის გაგრძელების ფუფუნება. ქვეყანაში დემოკრატიამ ზრდასრულობას უნდა მიაღწიოს, სადაც ჩვეულებრივ მოვლენად იქცევა მთავრობის ღია და თავისუფალი არჩევნებით ცვლილება. წინააღმდეგ შემთხვევაში, ჩამოყალიბდება ნახევრად ავტორიტარული სახელმწიფო, რომელიც მუდმივად მორიგი რევოლუციის მოლოდინში იქნება.
მინდა მივმართო ევროპის საბჭოს საპარლამენტო ასამბლეის ყველა მონაწილეს, დაეხმარეთ საქართველოს მშვიდობიანი და დემოკრატიული მომავლის უზრუნველყოფაში", - აღნიშნა თარგამაძემ სიტყვით გამოსვლისას.
