ზემო ლარსის სასაზღვრო-გამშვები პუნქტი დაკეტილია. მიზეზი უამინდობაა, რის გამოც პუნქტამდე მისვლა ვერ ხერხდება. დიდთოვლობის გამო სატრანსპორტო მოძრაობა დარიალის სასაზღვრო-გამშვებ პუნქტზე ორივე მხრიდან დროებით შეწყვეტილია.
ყაზბეგის რაიონში თოვლის საფარმა ნახევარ მეტრს გადააჭარბა. დიდთოვლობისა და ზვავსაშიშროების გამო, ავტომაგისტრალზე გადაადგილება ყველა სახის ტრანსპორტისთვის აკრძალულია. მოძრაობა შეფერხებულია სტეფანწმინდა-ლარსის და გუდაური-კობის მონაკვეთზეც, თუმცა კურორტამდე მისვლა შესაძლებელია. გზის გაწმენდითი სამუშაოები 24-საათიან რეჟიმში მიმდინარეობს, მობილიზებულია ტექნიკა და სამაშველო ბრიგადები.
მოულოდნელმა თოვლმა წუხელ პრობლემები შეუქმნა მძღოლებს თბილისის შემოგარენშიც. განსაკუთრებით წყნეთსა და კიკეთში. ადგილზე მობილიზებული იყო ქალაქის დასუფთავების სამსახური. გზის ამ მონაკვეთზე მთელი ღამის განმავლობაში ტექნიკური მარილი იყრებოდა. კეთილმოწყობის სამსახურის უფროსის განცხადებით, დილიდან მოქალაქეებს ამ მიმართულებით უსაფრთხოდ შეუძლიათ გადაადგილება.
