მთავრობამ „იაფი კრედიტის" პროგრამა შესაძლოა ისევ „გააცოცხლოს". სააგენტო „ჯი-ეიჩ-ენსთვის" ცნობილი ხდება, რომ მთავრობა 2008-2009 წლებში განხორციელებული „იაფი კრედიტის" მონიტორინგს ახორციელებს და პროექტის ფარგლებში გაცემული სესხის უკან დაბრუნების სტატისტიკას სწავლობს.
პროგრამის რევიზიის შემდეგ, თუ მთავრობა გაარკვევს, რომ ბენეფიციარები სესხებს გრაფიკის მიხედვით აბრუნებენ და გაცემული თანხები მიზნობრივად იქნა დახარჯული, მაშინ ხელისუფლებაში არ გამორიცხავენ, რომ ანალოგიური პროგრამა მომავალშიც აამოქმედონ. მთავრობაში ადასტურებენ, რომ ზოგიერთ მეწარმეს „იაფი კრედიტის" დაბრუნებისას გარკვეული პრობლემები აქვს.
„იაფი კრედიტის" პროგრამაში ჩართულ მეწარმეებს თანხის დაბრუნება, რომ უჭირთ ამას მთავრობის 2009 წლის 4 სექტემბრის №647 განკარგულებაც ადასტურებს, რომლის მიხედვითაც იმ მეწარმეებმა, რომლებმაც 2008 წელს "იაფი კრედიტის" პროგრამის ფარგლებში სესხი აიღეს და მისი დაფარვის პრობლემა შეექმნათ, საშეღავათო პერიოდი ერთი წლით, 2010 წლამდე გაუხანგრძლივდათ.
სტატისტიკური ინფორმაციის თანახმად, 2008 წელს „იაფი კრედიტის" პროგრამის ფარგლებში დაფინანსდა 117 პროექტი, საერთო ღირებულებით 62.4 მლნ. ლარი, ხოლო 2009 წელს დაფინანსდა 17 პროექტი და გაცემული კრედიტის მოცულობამ 2.5 მლნ ლარი შეადგინა.
2008-2009 წლებში კრედიტები გაიცა შემდეგ სფეროებში: ხილისა და ბოსტნეულის გადამუშავება; ჩაის მიღება-გადამუშავება; ყურძნის ჩაბარება და სასმელების წარმოება; რძის და ხორცის ჩამბარებელი პუნქტები; თხილის და მარცვლეულის (ხორბლის, მზესუმზირის) გადამუშავება; ხე-ტყის გადამუშავება, ბრიკეტებისა და მერქანბურბუშელოვანი ფილების (დსპ-ს)წარმოება; მეფრინველეობის ფაბრიკები; ფეხსაცმელების და სპეცქსოვილების წარმოება; ტურიზმი; ხალხური რეწვა; სხვადასხვა პროექტები
„იაფი კრედიტის" ფარგლებში სესხები 5-7 წლის ვადით გაიცა, რომელთა საპროცენტო განაკვეთი 7-9 %-ის ფარგლებში იყო.
