მინსკში მომხდარი აფეთქების გამოძიების პროცესში რუსეთის საგამოძიებო ჯგუფი ჩაერთვება.
ამის შესახებ განცხადება ბელორუსის გენერალური პროკურორის მოადგილე ანდრეი შვედმა გააკეთა. მისივე განმარტებით, აღნიშნულთან დაკავშირებით მოსკოვთან შეთანხმება უკვე მიღწეულია.
აღსანიშნავია, რომ გამოძიებას ბელორუსის დედაქალაქის ცენტრალურ მეტროსადგურში მომხდარ ტერორისტულ აქტში ეჭვმიტანილის სავარაუდო ფოტორობოტი უკვე აქვს.
ბელორუსის უშიშროების სამსახურის უფროსის ვადიმ ზაიცევის ინფორმაციით, ტერორისტული აქტი 27 წლამდე მამაკაცს უნდა განეხორციელებინა.
"ეს იყო 27 წლამდე მამაკაცი, 175-178 სმ. სიმაღლის, ეცვა ყავისფერი ქურთუკი და ატარებდა ყავისფერ ქუდს", - აღნიშნა ზაიცევმა.
შეგახსენებთ, რომ მეტროსადგურ "ოკტიაბრსკაიაზე" აფეთქება 11 აპრილს მოხდა, რასაც 12 ადამიანი ემსხვერპლა, 130-მდე მოქალაქე კი დაშავდა. გამოძიების წინასწარი ინფორმაციით, მეტროსადგურში კუსტარულად დამზადებული ასაფეთქებელი მოწყობილობა მაშინ ამოქმედდა, როცა მეტროსადგურში ორი მატარებელი შევიდა.
აღნიშნულის გამო ბელორუსში 13 აპრილი გლოვის დღედაა გამოცხადებული.
