საქართველოს ეკონომიკისა და მდგრადი განვითარების სამინისტრო კოორდინაციას გაუწევს სამუშაო ჯგუფს, რომელიც ჩინეთის ბაზარზე ქართული ღვინის ექსპორტის გაზრდის საკითხზე იმუშავებს.
სამუშაო ჯგუფის შექმნა დღეს მინისტრის პირველი მოადგილის არჩილ კეკელიასა და ღვინის მწარმოებელი კომპანიების ხელმძღვანელებთან შეხვედრაზე გადაწყდა.
კეკელიამ ქართველ მეღვინეებთან ერთად დეტალურად განიხილა ჩინეთის ბაზრის ათვისების შესაძლებლობები და კონკრეტული გეგმებიც დასახა.
შეხვედრას ოცამდე კომპანიის ხელმძღვანელი, ასევე, სოფლის მეურნეობის მინისტრის მოადგილე მალხაზ აკიშბაია, საქართველოს ეროვნული საინვესტიციო სააგენტოს და "სამტრესტის" წარმომადგენლები დაესწრნენ.
კეკელიას განცხადებით, საქართველოს მთავრობა დაინტერესებულია გაზარდოს ქართული პროდუქციის ექსპორტი იმ ქვეყნებში, სადაც ქართულ ღვინოს უკვე კარგად იცნობენ. ამავე დროს, იგეგმება იმ ბაზრების ათვისება, სადაც ქართული ღვინო ნაკლებად ცნობადია. ამ შემთხვევაში აქცენტი გაკეთდა ჩინეთზე, რომლის უზარმაზარი ბაზარიც ქართული პროდუქციის ექსპორტისთვის რეალურ შესაძლებლობას იძლევა. ქართული ღვინის ექსპორტის საკითხზე შეხვედრები უკვე გამართა ეკონომიკისა და მდგრადი განვითარების მინისტრის პირველმა მოადგილემ, რომელიც ჩინეთიდან ორი კვირის წინ დაბრუნდა. კეკელია ამ საკითხთან დაკავშირებით ჩინეთში ვიზიტს ამჯერად უკვე ქართველ მეღვინეებთან ერთად უახლოეს მომავალში გეგმავს.
