2012 წელს საქართველოს სახელმწიფო ვალი მთლიან შიდა პროდუქტთან მიმართებაში 38%-მდე ჩამოვა. ამის შესახებ საქართველოს ფინანსთა მინისტრმა კახა ბაინდურაშვილმა საფინანსო-საბიუჯეტოს კომიტეტის სხდომაზე განაცხადა.
მინისტრის თქმით, ქვეყანას მიმდინარე წელს მთლიან შიდა პროდუქტთან მიმართებაში სახელმწიფო ვალი 43% აქვს, აქედან საგარეო ვალი 35%-ს შეადგენს, ხოლო დარჩენილი 8% - შიდა ვალია.
ბაინდურაშვილის მტკიცებით, დღეს არსებული სახელმწიფო ვალის ნიშნული საერთაშორისო ნორმებით დადგენილ ნიშნულს არც კი უახლოვდება, რომლის მიხედვითაც, სახელმწიფო ვალი მთლიან შიდა პროდუქტთან მიმართებაში 60%-ს არ უნდა აღემატებოდეს.
"მნიშვნელოვანი ინდიკატორია, რამდენს ხარჯავს მთავრობა ვალების მომსახურებაზე. საქართველოში ეს არის წლიურად 5-8%, აღნიშნული მაჩვენებელი 2013 წელს 20%-ს მიაღწევდა, მაგრამ 2008 წელს გამოშვებული ევრობონდების რეფინანსირების შემდეგ მომსახურების ძველი პროცენტი შენარჩუნებული იქნება", - დასძინა მინისტრმა.