ამერიკის შეერთებული შტატების ფედერალური გამოძიების ბიურომ საიდუმლო მასალები გამოააშკარავა, რომლებიც "ნიუ-მეხიოს" შტატში, 1947 წელს უცხოპლანეტელების საფრენი აპარატის ჩამოვარდნას უკავშირდება.
მასალების თანახმად, ამერიკის შეერთებული შტატების ხელისუფლება "როზუელის" ავიაბაზაზე, საიდუმლო ვითარებაში, უცხოპლანეტელი პილოტების სხეულის მეცნიერულ კვლევას ატარებდა, რაზეც პრესაში დაბეჭდილი ფოტოებიც მეტყველებს. სკეპტიკოსების ვარაუდით კი, პრესაში გავრცელებული სურათები სინამდვილეს რა ასახავს.
"ფედერალური ბიუროს მიერ წარმოებულ საბუთებში წერია, რომ მათ ხელში დანამდვილებით აღმოჩნდა დაღუპული უცხოპლანეტელების გვამები", - წერს გაზეთი "Daily Mail"-ი.
ამასთან, აგენტი გაი ხოტელი მოხსენებაში "მფრინავი თეფშები" ფედერალური ბიუროს დირექტორს ატყობინებდა, რომ "ნიუ-მეხიკოში 3 ე.წ. მფრინავი თეფშია ნაპოვნი და ამოუცნობი საფრენი აპარატების აღწერილობა შემდეგია: ეს არის შუაში გამსხვილებული, მრგვალი ფორმის საფრენი ობოექტი დაახლოებით 15 მეტრის რადიუსით. ყოველ მათგანში ნაპოვნი იქნა 3 გვამი ადამიანის სხეულის აღწერილობით, მაგრამ სიმაღლეში მხოლოდ 90 სანტიმეტრი", - წერდა აგენტი.
მისივე მიმოწერიდან ირკვევა, რომ გვამებს რკინის ქსოვილი "ეცვათ" და ყველა მათგანი იმგვარად იყო შეხვეული, რომ მფრინავების უნიფორმას მოგაგონებდათ.
ხოტელის ცნობით "ამოუცნობი მფრინავი ობიექტის ჩამოვარდნა ნიუ-მეხიკოში არსებულმა დიდი სიმძლავრის რადარმა გამოიწვია. კერძოდ, რადარის გამოსხივებამ მწყობრიდან გამოიყვანა საფრენი ობიექტის მექანიზმი".
მეორე მოხსენების თანახმად კი, "დისკი" არ იყო თეფშის ფორმის, არამედ მას ექვსკუთხედის ფორმა ჰქონდა და მეტეოზონდს მოგაგონებდათ.
დოკუმენტების გამოქვეყნებამ, შესაძლოა, ამერიკის შეერთებული შტატების ხელისუფლების წინააღმდეგ საზოგადოებისთვის აღნიშნული ინფორმაციის დამალვის გამო, ბრალდებების ახალი ტალღის აგორება გამოიწვიოს.
აღსანიშნავია, რომ ბრიტანელ ექსპერტს ამოუცნობი მფრინავი ობიექტების საკითხში ნიკ პოულს აღნიშნული ინფორმაციის ჭეშმარიტებაში ეჭვი არ ეპარება და აცხადებს, რომ გამოქვეყნებული საიდუმლო მასალები შეიძლება გახდეს უტყუარი მტკიცებულება იმისა, რომ უცხოპლანეტელები ნამდვილად არსებობენ.