ამის შესახებ „ჯი-ეიჩ-ენს" ეკონომიკის საკითხებში ექსპერტმა ირაკლი ლექვინაძემ განუცხადა.

"საქართველოს 10-წლიანი ევრობონდების განთავსებას და მისი საშუალებით ძველი ვალის გადაფარვას ამ ეტაპზე ალტერნატივა არა აქვს, მაგრამ ის ფაქტი, რომ ფასიანი ქაღალდების განთავსება მოხდა კანონის მიღებამდე ერთი დღით ადრე, ცოტა გაუგებარია. როგორც ჩანს, ჩვენს მთავრობას ძალიან ეჩქარებოდა ამ ოპერაციის განხორციელება", - აღნიშნა ლექვინაძემ.

მისივე შეფასებით, იმის გათვალისწინებით, რომ საქართველოს ძველი ვალების გასტუმრება 2013 წელს უწევდა, ვადამდე მისი გადაფარვა, თან უფრო დაბალ პროცენტში, მნიშვნელოვანია.

"ამ ოპერაციის განხორციელება ძველი ვალების გასტუმრების ვადის ამოწურვამდე 2 წლით ნიშნავს, რომ ამ პერიოდის პროცენტი ჩვენ, პრაქტიკულად, დავზოგეთ. აქვე უნდა აღვნიშნოთ, რომ ინვესტორების 83%-ს კაპიტალი ძველი, 5- წლიან ევრობონდებში ჰქონდა ჩადებული და მისი ჩანაცვლება ახალი ევრობონდებით მოახდინა", - აღნიშნა ეკონომიკის ექსპორტმა.

შეგახსენებთ, რომ საქართველოს მთავრობამ ევრობონდების მორიგი ემისია განახორციელა. პრემიერ-მინისტრ ნიკა გილაურის განცხადებით, გასულ კვირას საქართველოს მთავრობამ 10-წლიანი ევრობონდი გამოუშვა, რომლის ტრანზაქციაც დღეს სრულდება, თუმცა მოქმედებები გასული კვირის განმავლობაში ჩატარდა. მისი განმარტებით, 2011 წელს ემისირებული ევრობონდების საპროცენტო განაკვეთი შედარებით დაბალია 2008 წელს გამოშვებულ ევრობონდების საპროცენტო განაკვეთთან შედარებით. 2008 წელს გამოშვებული 500 მილიონი დოლარის საპროცენტო განაკვეთი 7,5 %-ს შეადგენდა, ხოლო ახლადგამოშვებული ევრობონდების საპროცენტო განაკვეთი 6,9 %-ია. პრემიერის თქმით, ევრობონდების გამოშვება განხორციელდა მაშინ, როდესაც პორტუგალიას სესხებს 10-12 %-ის ფარგლებში აძლევენ, საბერძნეთს - 10-11 %-ის ფარგლებში, ხოლო ირლანდიას - 11-12 %-ის ფარგლებში. "ევროკავშირისა და ნატოს წევრ ქვეყნებთან შედარებით, საქართველოს უფრო მეტი ნდობა აქვს მსოფლიო საფინანსო ბაზარზე", - ამტკიცებს პრემიერი. როგორც ცნობილია, 2008 წელს გამოშვებული ევრობონდებიდან მიღებული თანხებით 2009-2010 წლებში დევნილებისთვის ინფრასტრუქტურის მშენებლობა და ბიუჯეტის დაბალანსება მოხდა. ამასთან, გილაურის თქმით, საქართველოს საერთაშორისო სავალუტო ფონდისთვის 400 მილიონი დოლარის ოდენობის ვალი აქვს გასასტუმრებელი, რომელსაც ქვეყანა ეტაპობრივად, 2012-2014 წლებში დაფარავს.