ხვალიდან, 12 აპრილიდან, გამოცდების ეროვნული ცენტრი გამოსაშვები გამოცდების გენერალურ რეპეტიციას ატარებს. გენერალური რეპეტიცია 12-იდან 15 აპრილის ჩათვლით ჩატარდება და მასში მონაწილეობას საქართველოს ყველა რაიონის 326 სკოლა მიიღებს
გამოცდების ეროვნული ცენტრის ორგანიზებით, 326 სკოლის 14 ათასზე მეტი მეთორმეტეკლასელი 12-იდან 15 აპრილის ჩათვლით საცდელ ტესტირებას 8 საგანში გაივლის. მოსწავლეები იმუშავებენ პორტატულ კომპიუტერებზე, რომელთა მსგავსს მაისში, გამოსაშვები გამოცდებისას გამოიყენებენ.
გამოსაშვები გამოცდების გენერალური რეპეტიციის მიზანია ადმინისტრირების მექანიზმების, პროგრამული, ტექნიკური უზრუნველყოფისა და ტესტური დავალებების გამოცდა. გენერალური რეპეტიცია 12 აპრილს, 10:00 საათზე ქართული ენისა და ლიტერატურის ტესტირებით დაიწყება. მესამე და მეოთხე სესია მათემატიკის ტესტურ დავალებებზე მუშაობას დაეთმობა.
გამოსაშვები გამოცდების გენერალური რეპეტიცია 15 აპრილს ფიზიკისა და ქიმიის გამოცდით დასრულდება.
