თბილისში ფიზიკური პირები მიწის ქონების გადასახადისგან გათავისუფლდნენ. საკრებულოს დღევანდელ სხდომაზე მიღებული გადაწყვეტილებით, ცვლილება იმ კერძო პირებზე ვრცელდება, რომლებიც მრავალბინიან სახლებში თანასაკუთრებაში არსებულ, საცხოვრებელ სახლებზე და ავტოფარეხებზე მიმაგრებულ მიწის ნაკვეთებს ფლობენ.
ეს გადაწყვეტილება დეპუტატებმა საკრებულს სხდომაზე დღეს ხმათა უმრავლესობით მიიღეს.
დღემდე მიწის ქონების გადასახადს ის თბილისელები იხდიდნენ, რომლებსაც საკუთრებაში 600 კვ/მ-ზე მეტი საცხოვრებელი, ხოლო 18 კვ/მ-ზე მეტი ავტოფარეხის ფართობი ჰქონდათ.
როგორც საკრებულოს ქონების მართვისა და საფინანსო-საბიუჯეტო კომისიის თავჯდომარემ თამაზ შოშიაშვილმა განაცხადა, საკრებულოს ცვლილებების თანახმად, ქონების გადასახადისგან თავისუფლდებიან თბილისის მრავალბინიან სახლებში მცხოვრები ფიზიკური პირები, რომლებსაც თავისივე კორპუსში თანასაკუთრებაში აქვთ მიწის ნაკვეთები. მისი თქმით, ცვლილება ასევე ვრცელდება საცხოვრებელ სახლებზე მიმაგრებული მიწის ნაკვეთის სრულ ფართობზე.
საკრებულოს დღევანდელი გადაწყვეტილებით, ქონების გადასახადისგან გათავისუფლება ეხებათ ავტოფარეხის მფლობელებსაც, რომლებიც მიმაგრებული მიწის ნაკვეთის სრულ ფართობს მხოლოდ ავტომობილის გასაჩერებლად იყენებენ. რაც შეეხებათ ავტოფარეხის მფლობელებს, რომლებსაც აღნიშნული ტერიტორია ეკონომიკური საქმიანობისთვის აქვთ განკუთვნილი, მათზე გადასახადის გაუქმება არ იგეგმება.
