გამოძიებისას და სასამართლოში საექსპერტო კვლევის ობიექტის დაუცველობა სისხლის სამართლის დანაშაულად ჩაითვლება. აღნიშნულთან დაკავშირებით ცვლილება შედის "სისხლის სამართლის კოდექსში".
კანონპროექტის თანახმად, მოწმის ან დაზარალებულის მიერ ცრუ ჩვენების მიცემას ან ექსპერტის მიერ ყალბი დასკვნის ან ჩვენების მიცემას, ექსპერტის მიერ განზრახ ან გაუფრთხილებლობით საექსპერტო კვლევის ობიექტის დაუცველობაც ემატება, რაც დაისჯება ჯარიმით ან საზოგადოებისთვის სასარგებლო შრომით ვადით ას ოთხმოციდან ორას ორმოც საათამდე, ან გამასწორებელი სამუშაოთი, ვადით ორ წლამდე ანდა თავისუფლების აღკვეთით ვადით სამიდან ხუთ წლამდე.
მოქმედი ნორმით, ჯარიმით ან საზოგადოებისთვის სასარგებლო შრომით ვადით ას ოთხმოციდან ორას ორმოც საათამდე ისჯება მოწმის ან დაზარალებულის მიერ ცრუ ჩვენების მიცემა, ექსპერტის მიერ ყალბი დასკვნის ან ჩვენების მიცემა, ანდა თარჯიმნის მიერ განზრახ არასწორად თარგმნა გამოძიების დროს ან სასამართლოში.
კანონი ასევე ითვალისწინებს აღნიშნული დანაშაულის ჩადენის შემთხვევაში სასჯელის ალტერნატივას გამასწორებელი სამუშაოთი დასჯას ვადით ორ წლამდე, ანდა თავისუფლების აღკვეთას ვადით სამიდან ხუთ წლამდე.
კანონპროექტის ავტორები დეპუტატები პავლე კუბლაშვილი და გიორგი ჩივიაშვილი არიან.