საპარლამენტო ოპოზიცია იმ პირთა წრის გაფაროებას ითხოვს, რომელთაც მაუწყებლის ლიცენზიის ფლობა აეკრძალებათ.
კანონპროექტის თანახმად, საჯარო მოხელეებს, თანამდებობის პირებსა და პოლიტიკური პარტიების წევრებს მაუწყებლის ლიცენზიის ფლობა ეკრძალებათ, თუმცა ოპოზიციას მიაჩნია, რომ ეს შეზღუდვა მათი ოჯახის წევრებზედაც უნდა გავრცელდეს. წინააღმდეგ შემთხვევაში, აღნიშნულ შეზღუდვებს აზრი არ ექნება.
"გაითვალისწინეთ, რომ საქართველოში ცხოვრობთ და თუ პავლე კუბლაშვილს აეკრძალება აქციების ფლობა, ის მათ ძმაზე ან შვილზე გადაფორმებს", - მიმართა უმრავლესობის წევრებს "ქართული დასის" ლიდერმა, ოპოზიციონერმა დეპუტატმა ჯონდი ბაღათურიამ.
დეპუტატმა თამაზ დიასამიძემ მოითხოვა, აკრძალვა დაწესდეს არა მხოლოდ პოლიტიკურ პარტიასა და პარტიის თანამდებობის პირებზე, არამედ ზოგადად წევრებზე, ასევე აკრძალვა უნდა იყოს ადმინისტრაციულ ორგანოსთან ურთიერთ დამოიკდებულების მქონე არა მხოლოდ იურიდიულ პირებზე, არამედ ფიზიკურ პირებზედაც.
საპარლამენტო უმრავლესობის წევრმა, პროექტის ერთ-ერთმა ავტორმა ჩიორა თაქთაქიშვილმა განაცხადა, რომ საქართველოში სულ 27 ათასი საჯარო მოხელეა და თუ მათ ოჯახის წევრებზე გავრცელდება აკრძალვა, გამოდის, რომ აკრძალვა საქართველოში სულ 100 ათასამდე მოქალაქეზე დაწესება.
"ქრისტიან-დემოკრატების" წევრმა ლევან ვეფხვაძემ მოითხოვა, აკრძალვა მაღალი თანამდებობის პირების ოჯახის წევრებზე მაინც დაწესდეს, თუმცა უმრავლესობამ ეს შენიშვნაც არ გაიზიარა.
"მაუწყებლობის შესახებ" კანონში ცვლილებების პროექტი, რომელიც მედიაგამჭვირვალეობას ეხება, პარლამენტმა მეორე მოსმენით, 71 ხმით დაამტკიცა.