2011 წლის სახელმწიფო ბიუჯეტში ევრობონდების საპროცენტო განაკვეთი და ვადიანობა აღარ განისაზღვრება, ამის შესახებ დღეს, პარლამენტის პლენარულ სხდომაზე ფინანსთა მინისტრის პირველმა მოადგილემ პაპუნა პეტრიაშვილმა "სახელმწიფო ვალის შესახებ" კანონში ცვლილებების გატანისას აღნიშნა, რომელსაც პარლამენტი დღეს, მეორე-მესამე მოსმენით დაამტკიცებს.
"პირველი მოსმენის შემდეგ შეიცვალა ბიუჯეტის კანონის რედაქცია, საიდანაც ამოღებულია ის დათქმა, რომ ბიუჯეტის კანონში განსაზღვრული უნდა იყოს საპროცენტო განაკვეთი და ვადიანობა", - აღნიშნა პეტრიაშვილმა.
მისივე თქმით, აღნიშნული ცვლილება გამომდინარეობს იქიდან, რომ ევრობონდების საპროცენტო განაკვეთი და ვადიანობა ვაჭრობის დროს დგინდება და მისი წინასწარ განსაზღვრა შეუძლებელია.
შეგახსენებთ, რომ კანონპროექტის თანახმად, ფინანსთა სამინისტრო მიმდინარე წელს ევრობონდების მეორე ემისიას გეგმავს, რომლის მოცულობაც 500 მილიონი დოლარი იქნება.
ცვლილება კანონის გარდამავალ დებულებას ეხება, რომელიც სახელმწიფო ვალის სრული მოცულობის გაზრდას კრძალვას, თუმცა გამონაკლის 2008 წლის აგვისტოში დაუშვეს, როდესაც ევრობონდები რუსეთის აგრესიის შემდეგ იქნა დახარჯული. ახალი ევრობონდები კი სწორედ 2008 წელს აპრილში გამოშვებული ევრობონდის რეფინანსირებას მოხმარდება.
აღსანიშნავია, რომ ახალი ევრობონდების ვადები 7-დან 10 წლამდე გაიზრდება, რის შედეგადაც ძველი ევრობონდების რეფინასირების შემდეგ მისი გადახდა 2020 წლისთვის გადაიწვეს და მის გამოყენება საბიუჯეტო ხარჯებისთვის იკრძალება.