აჭარა საგადასახადაო კოდექში ცვლილებებს ითხოვს, რომლის მიხედვითაც რეგიონში ინვესტირების მსურველებს, გარკვეული საგადასახადო შეღავათები დაუწესდება.
საგადასახადო კოდექსში შესატანი ცვლილებების პროექტი აჭარის მთავრობას უკვე მზად აქვს და უახლოეს დღეებში პროექტს ცენტრალურ ხელისუფლებას წარუდგენს, რომელიც თავის მხრივ კანონპროექტს განხილივს და მოწონების შემთხვევაში პარლამენტში დასამტკიცებლადაც შეიტანს.
აჭარის მთავრობაში განმარტავენ, რომ საკანონმდებლო ინიციატივის მიზანია, სახელმწიფო და აჭარის ავტონომიური რესპუბლიკის საკუთრებაში არსებული ქონების საბაზრო ღირებულებაზე ნაკლებ ან სიმბოლურ ფასად პრივატიზების შემთხვევაში პრივატიზებული ქონების ღირებულება არ ჩაითვალოს ქონების შემძენის ერთობლივ შემოსავალში. ასევე არ ჩაითვალოს ერთობლივ შემოსავალში საერთაშორისო საფინანსო ორგანიზაციების მიერ ფიზიკურ ან იურიდიულ პირებზე შეღავათიანი სესხის გაცემისას საქართველოს ფინანსთა მინისტრის მიერ განსაზღვრულ საპროცენტო განაკვეთსა და მიღებული სესხის საპროცენტო განაკვეთს შორის სხვაობა.
აღნიშნული ხელს შეუწყობს საქართველოს საინვესტიციო გარემოს გაუმჯობესებას და მეწარმეობის განვითარებას. ადგილობრივი თვითმმართველობის ორგანოების მიერ დიფერენცირებული ქონების გადასახადის შემოღება დადებით ზეგავლენას მოახდენს მნიშვნელოვანი კაპიტალდაბანდებების განხორციელებაზე.
აღსანიშნავია, რომ საგადასახადო კოდექსის შესაბამისად ადგილობრივი თვითმმართველობის წარმომადგენლობითი ორგანოები უფლებამოსილნი არიან შემოიღონ ქონების გადასახადი ერთიანი განაკვეთის სახით ან დარგების მიხედვით. ვინაიდან საგადასახადო კოდექსი არ იძლევა შესაძლებობას ადგილობრივმა თვითმმართველობის წარმომადგენლობითმა ორგანოებმა ქონების გადასახადი შემოიღონ არა მარტო დარგების, არამედ სხვა კრიტერიუმების მიხედვით დიფერენცირებულად, აღნიშნული გარემობა უარყოფითად მოქმედებს მნიშვნელოვანი კაპიტალდაბანდებით ახალი ტურისტული ობიექტების შექმნისათვის ინვესტიციების მოზიდვაზე, რამდენადაც ასეთ შემთხვევებში ქონების გადასახადი საკმაოდ დიდ თანხას შეადგენს და ტურისტულ ბიზნეს განსაკუთრებით საქმიანობის დაწყების პირველ წლებში მძიმე ტვირთად აწვება.