გურჯაანის რაიონის სოფელ ვაჩნაძიანში მდებარე VIII-IX საუკუნეების ყველაწმინდის ჯვარგუმბათოვანი ეკლესიის სარეაბილიტაციო სამუშაოები მაისში დაიწყება. კულტურული მემკვიდრეობის დაცვის სააგენტომ რეაბილიტაციის პირველი ეტაპისთვის 100 ათასი ლარი გამოყო.
„პირველ ეტაპზე ეკლესიის საძირკვლის და კედლების გამაგრებითი სამუშაოები ჩატარდება. ზამთრის შემდეგ ეკლესიის კედლებს ახალი ბზარები დაემატა. რთული მდგომარეობაა. ეკლესიის სამხრეთის ამორტიზირებულ კედელს მთლიანად ჩამოვშლით და იმავე ქვით ახალ, მყარ კედელს ავაშენებთ. სამუშაოების მეორე ეტაპზე კი ტაძარს სრულად აღვადგენთ", - განუცხადა კახეთის საინფორმაციო ცენტრს არქიტექტორმა მიშა გელაშვილმა.
ვაჩნაძიანის ყველაწმინდის ტაძარში სართულთშორისი გადახურვა წელს, ზამთარში ჩამოინგრა. ნაგებობა, რომელიც ქართული არქიტექტურის ერთ - ერთი მნიშვნელოვანი ნიმუშია, ძლიერად არის დაზიანებული. ეკლესიაში სახურავიდან წყალი ჩადის, დაბზარულია თითქმის ყველა კედელი, ჩამონგრევაზეა ჭერი. ვაჩნაძიანის ყველაწმინდა სოფლიდან 8 კილომეტრის მანძილზეა, ტყეში. ტაძრისკენ მიმავალი გზა დახრამულია. ეკლესიამდე ასვლა ორხიდიანი მანქანით არის შესაძლებელი.