ეკონომიკისა და მდგრადი განვითარების მინისტრი ინვესტიციების მოზიდვას უკვე ხორვატიიდან გეგმავს. ბოსნია-ჰერცოგოვინაში ოფიციალურ ვიზიტად მყოფი ვერა ქობალია, ხორვატიის ეკონომიკის სამინისტროს მაღალჩინოსნებს შეხვდა. შეხვედრაზე გადაწყდა, რომ საქართველო და ხორვატია ერთობლივ ჯგუფებს შექმნიან, რომლებიც სხვადასხვა ეკონომიკური ხელშეკრულებების პროექტზე იმუშავებენ, რომლის მთავარი მიზანიც საქართველოში ხორვატიული ინვესტიციის შემოტანა და ორ ქვეყანას შორის ვაჭრობის გაზრდაა.
"მნიშვნელოვანი შეხვედრები მქონდა სხვადასხვა ქვეყნების ეკონომიკური გუნდის წარმომადგენლებთან. მათ შორის შევხვდი ხორვატიის ეკონომიკის სამინისტროს წარმომადგენლებს და გადავწყვიტეთ, რომ უახლოეს მომავალში, ორ ქვეყანას შორის ეკონომიკური ჯგუფი შევქმნათ. საქართველოში ხორვატიული ინვესტიცია მოვიზიდოთ და იმავდროულად გავიზიაროთ ხორვატიული გამოცდილება, რადგანაც იქ ყოველწლიურად 10 მლნ. ტურისტი ჩადის. საქართველო 2015 წლამდე 5 მლნ. ტურისტის მოზიდვას გეგმავს და ამ მიმართულებით ხორვატიული გამოცდილების გაზიარება მნიშვნელოვანია.
შეგახსენებთ, რომ საქართველოს ეკონომიკისა და მდგრადი განვითარების მინისტრი ვერა ქობალია ბოსნია-ჰერცოგოვინას დედაქალაქ სარაევოში ეკონომიკურ ფორუმს ესწრება. ვერა ქობალიამ შეხვედრები უკვე გამართა ბალკანეთის ქვეყნების მთავრობების წარმომადგენლებთან. მინისტრი შეხვდა ასევე თურქეთისა და მალაიზიის ეკონომიკის მინისტრებს.