ებრაული კომპანია ქართულ ავიაკომპანია "აირზენასთან" ჩარტერული რეისის დანიშვნაზე მოლაპარაკებებს აწარმოებს. თუმცა ისრაელის ტრანსპორტის სამინისტრო ამ ინფორმაციას ოფიციალურად უარყოფს.
როგორც სააგენტო "ჯი-ეიჩ-ენს" "აირზენაში" დაუდასტურეს, რომ ერთ-ერთი ებრაული კომპანია თელ-ავივი-ბათუმის მიმართულებით ჩარტერული რეისების დანიშვნაზე ავიაკომპანიასთან მოლაპარაკებებს აწარმოებს.
თუმცა დღეს ინტერნეტპორტალი IzRus ისრაელის ტრანსპორტის სამინისტროს პრესსამსახურის წარმომადგენელზე ზინა როიტმანზე დაყრდნობით აღნიშნულ ინფორმაციას უარყოფდა.
"თელ-ავივსა და ბათუმს შორის პირდაპირი ავიარეისების დანიშვნაზე ინფორმაციას არ ვფლობ. არანაირი სათანადო დოკუმენტი ჩვენს უწყებაში შემოსული არ არის", - განაცხადა ზინა როიტმანმა.
შეგახსენებთ, რომ სააგენტო "ჯი-ეიჩ-ენი" აჭარის ტურიზმის დეპარტამენტის თავმჯდომარის მოადგილეზე დაყრდნობით წერდა, რომ ივლისიდან ბათუმსა და თელ-ავივს შორის ჩარტერული რეისები დაინიშნება, რომელსაც "აირზენა" "ეშეთ ტურის" დაკვეთით განახორციელებს.