საქართველოს პრეზიდენტი მიხეილ სააკაშვილი ქვეყანაში მოქმედი ექიმების გადამზადების აუცილებლობაზე საუბრობს.
"ჩვენ კვალიფიციური ექიმები გვყავს, თუმცა ძალიან მნიშვნელოვანია, რომ მათი გადამზადება მოხდეს, რათა ისინი იმ ახალ სამედიცინო სისტემას მოერგონ, რომელსაც ჩვენ ვაშენებთ. ხალხი სამკურნალოდ უცხოეთში აღარ უნდა გადიოდნენ. მართალია, ახლა რუსეთში აღარავინ მიდის, მაგრამ მიდიან სტამბულში, მინსკში, ბაქოში, ერევანში, რაც არ არის სწორი", - განაცხადა პრეზიდენტმა სამეგრელოში ყოფნისას.
მისი შეფასებით, ჯანდაცვის ახალი სისტემა სწრაფი ტემპით ვითარდება.
"ახალი საავადმყოფოების აშენების შემდეგ ჩვენთვის მეორე მნიშვნელოვანი საკითხი იქნება, რომ სამედიცინო მომსახურებისთვის ხალხს ხელი მიუწვდებოდეს. წინააღმდეგ შემთხვევაში, ახალ საავადმყოფოებს აზრი არ ექნება", - აღნიშნა ქვეყნის პირველმა პირმა.
შეგახსენებთ, რომ საქართველოში სულ 140 ახალი საავადმყოფო აშენდება.
