"2010 წელი ჩვენ დავასრულეთ 6,4 პროცენტიანი ეკონომიკის ზრდით. ეს არ არის პატარა ციფრი, თუ გავითვალისწინებთ დღეს რეგიონში არსებულ რეალობას. ეს ნათლად მიუთითებს იმას, რომ ქვეყანა ერთ-ერთი პირველი გამოვიდა რეცესიიდან ჩვენს რეგიონში",_აღნიშნა საქართველოს პარლამენტში სამთავრობო დებატებზე გამოსვლისას პრემიერ-მინისტრმა ნიკოლოზ გილაურმა.
მისი თქმით, ბოლო 2 წლის ჯამური მაჩვენებლით, ბევრი ქვეყანა ჯერ კიდევ უარყოფით ზრდაშია. ამასთან, გილაურმა ჩვენი რეგიონის გასული წლის შედეგების მიხედვით, სხვა ქვეყნების მონაცემები დაასახელა. კერძოდ, გილაურის თქმით, საერთაშორისო სავალუტო ფონდის ვებგვერდზე გამოქვეყნებული მონაცემებით, ეკონომიკური ზრდის მაჩვენებელი სომხეთში 2010 წელს გაიზარდა 4 პროცენტით, აზერებაიჯანში - 4,2 პროცენტით, რუსეთში - 4 პროცენტით, ლატვიაში -1 პროცენტით, ლიტვაში - 1,3 პროცენტით, მოლდოვაში 3,2 პროცენტით, უკრაინაში - 3,7 პროცენტით, თურქეთში - 7,8 პროცენტით.
"თურქეთი ერთ-ერთია, თუ ერთადერთი არა ჩვენს რეგიონში, რომელსაც ჩვენზე უფრო მაღალი ზრდა ჰქონდა 2010 წელს. თუ გავითვალისწინებთ იმ რეალიებს, რაც ვითარდებოდა ჩვენს რეგიონში",_აღნიშნა გილაურმა.
მისი პროგნოზით, 2011 წლის იანვარ-თებერვალი უკვე საკმაოდ დამაიმედებელია.
"ჩვენ ველით, რომ იანვარ-თებერვლის მთლიანი შიდა პროდუქტის ჯამური ზრდა, A6-დან 7 პროცენტამდე იქნება. ამის საფუძველს გვაძლევს დღგ-ს ბრუნვების ზრდა, რომელიც გვქონდა იანვარ-თებერვალში და რომელიც პირდაპირ კორელაციაშია ეკონომიკის ზრდასთან და დღგ-ს ბრუნვების ზრდა 32 პროცენტი დაფიქსირდა იანვარ-თებერვალში",_განაცხადა პრემიერმა.
შეგახსენებთ, დღეს საქართველოს პრემიერ-მინისტრი ნიკოლოზ გილაური და მთავრობის წევრები საკანონმდებლო ორგანოში სამთავრობო დებატებზე იმყოფებიან.
