კანადამ, რომელმაც "დიდი შვიდეულის" ლიდერთა სამიტს უმასპინძლა, უარი თქვა გამოექვეყნებინა უკრაინის შესახებ სამიტის ერთობლივი განცხადება, შეერთებული შტატების პოზიციის გამო. იტყობინება სააგენტო Reuters-ი კანადის სამთავრობო წყაროებზე დაყრდნობით.
CBS News-ის ცნობით, ვაშინგტონს არ მოეწონა ერთობლივ განცხადებაში რუსეთის მიმართ გამოყენებული ზოგიერთი მწვავე შეფასება, რადგან თეთრი სახლი შიშობს, რომ ეს ხელს შეუშლის რუსეთთან მოლაპარაკებებს უკრაინაში ომის დასრულების თაობაზე.
როგორც იუწყებიან, კანადის პრემიერ-მინისტრი გეგმავს, ამ მწვავე შეფასებების ნაწილი თავის განცხადებაში გამოიყენოს.
უკრაინის შესახებ ერთობლივი განცხადების ნაცვლად, "დიდი შვიდეულის" ლიდერებმა გამოაქვეყნეს რამდენიმე სხვა ერთობლივი განცხადება, მათ შორის ახლო აღმოსავლეთში არსებული ვითარების, ხელოვნური ინტელექტის, მიგრაციისა და კრიტიკული მინერალური რესურსების შესახებ.
აშშ-ის პრეზიდენტმა დონალდ ტრამპმა დროზე ადრე დატოვა ლიდერთა სამიტი და 16 ივნისს საღამოს ვაშინგტონში დაბრუნდა, როგორც იუწყებიან, ირანსა და ისრაელს შორის კონფლიქტის ესკალაციის გამო. შედეგად, ვერ შედგა ტრამპისა და უკრაინის პრეზიდენტ ვოლოდიმირ ზელენსკის შეხვედრა, რომელიც სამიტის ფარგლებში უნდა გამართულიყო.
