შეერთებულ შტატებს აღარ შეუძლია იმ ფაქტის უგელებელყოფა, რომ რუსეთის პრეზიდენტი, ვლადიმირ პუტინი მშვიდობისთვის მზად არ არის. საომარი მოქმედებების დასრულების მომგებიანი შეთავაზების მიუხედავად, რუსეთის ლიდერი კომპრომისზე წასვლაზე უარს ამბობს. თუ ვაშინგტონს ნამდვილად განზრახული აქვს სტაბილური შეთანხმების მიღწევა, მან თავისი პირობები უნდა გაამკაცროს. ამის შესახებ Bloomberg წერს.
როგორც გამოცემა აღნიშნავს, აშშ-ის ადმინისტრაციის მცდელობა, გააძლიეროს დიპლომატიური ძალისხმევა უკრაინაში ომის დასასრულებლად, აღიარებას იმსახურებს. თუმცა, შეთანხმების მიღწევის მცდელობისას, შეთავაზებული ინიციატივები ხშირად ისეთ დათმობებს ჰგავდა, რომლებიც, ძირითადად, კრემლს დააკმაყოფილებდა. მდგრადი მშვიდობის მისაღწევად, აშშ-ს მოუწევს უფრო ძლიერი არგუმენტების წარდგენა და პუტინზე ზეწოლის გაზრდა, რათა მას კონსტრუქციული გადაწყვეტილებების მიღება აიძულოს.
მრავალი წყაროს ცნობით, ამერიკელმა ოფიციალურმა პირებმა წარმოადგინეს ცეცხლის შეწყვეტის გეგმა, რომლის თანახმადაც რუსეთი შეინარჩუნებს კონტროლს ამჟამად ოკუპირებული უკრაინის ტერიტორიების უმეტეს ნაწილზე.
გარდა ამისა, გეგმა სანქციების მნიშვნელოვან შემსუბუქებას ითვალისწინებს. შესაძლებელია, რომ აშშ-მა ოფიციალურად აღიაროს ყირიმი, რომელიც 2014 წელს იქნა ანექსირებული.
უკრაინას შეიარაღებული ძალების შენარჩუნების უფლება მიეცემა, თუმცა უსაფრთხოების გარანტიები ბუნდოვანი იქნება და მათ მხოლოდ მოკავშირეთა კოალიცია უზრუნველყოფს აშშ-ის პირდაპირი მონაწილეობის გარეშე.
სულ მცირე, ამჟამინდელი ამერიკული ადმინისტრაციის მმართველობის პერიოდში ნატო-ში წევრობა დაბლოკილი იქნება. დარჩენილი დეტალები საომარი მოქმედებების დასრულების შემდეგ განიხილება.
ამ მომგებიანი შეთავაზების მიუხედავად, პუტინი არ აჩვენებს აგრესიის შეჩერების ნიშნებს - ის დაჟინებით მოითხოვს უკრაინის ოთხივე რეგიონზე კონტროლს, რომლებიც ამჟამად ნაწილობრივ ოკუპირებულია.
პასუხად, უკრაინელი ოფიციალური პირები აშშ-ის სამხედრო მხარდაჭერის გაგრძელების უფრო მკაფიო გარანტიებს ითხოვენ: არა აუცილებლად პირდაპირი ყოფნით, არამედ საჰაერო თავდაცვის, კიბერთავდაცვის, დაზვერვისა და მოკავშირე სამშვიდობო ძალების მხარდაჭერით.
წინააღმდეგ შემთხვევაში, ცეცხლის შეწყვეტის შეთანხმება შესაძლოა რუსეთის არმიისთვის აღდგენისთვის საჭირო პაუზად იქცეს. უახლესი შეთანხმება, რომელიც აშშ-ს უკრაინულ მინერალებზე წვდომის პრიორიტეტს ანიჭებს, უსაფრთხოების გარანტიებს არ ცვლის.
როგორც Bloomberg წერს, ვაშინგტონმა ორი მნიშვნელოვანი რამ უნდა გაითვალისწინოს:
პირველ რიგში, უკრაინელები უბრალოდ დათანხმდებიან კაპიტულაციას, რაც, მათი აზრით, განახლებულ შეტევას გამოიწვევს. ტერიტორიების გათავისუფლების კუთხით მნიშვნელოვანი პროგრესის არარსებობის მიუხედავად, უკრაინის თავდაცვა მდგრადი რჩება. ქვეყანას ამჟამად ევროპაში ყველაზე დიდი რეგულარული არმია ჰყავს და აქტიურად ზრდის საკუთარი იარაღის წარმოებას. უკრაინელები დაიღალნენ ომით, მაგრამ დანებებისთვის მზად არ არიან.
მეორეც, რუსეთის უპირატესობა აბსოლუტური არ არის. ბოლო სამი წლის განმავლობაში რუსული ჯარების წინსვლა ნელი იყო და კრემლს ძვირი დაუჯდა. ომის დროინდელი ეკონომიკა ზეწოლის ქვეშაა: ინფლაცია, მუშახელის დეფიციტი, მაღალი საპროცენტო განაკვეთები და კლებადი სავალუტო რეზერვები მის სტაბილურობას ძირს უთხრის. ნავთობის ფასების კლება ასევე ამცირებს ბიუჯეტის ძირითად შემოსავლებს.
„რაც უფრო დიდხანს გაგრძელდება ომი, მით უფრო გაიზრდება ეკონომიკური კოლაფსის და სოციალური არეულობის რისკი ქვეყანაში [რუსეთში].
პუტინს აქვს საფუძვლიანი მიზეზი, რომ შეთანხმების მიღწევა სურდეს და ასევე, ეშინოდეს ამერიკის მხრიდან ზეწოლის, თუ ამას არ გააკეთებს“, - წერს Bloomberg.
