აშშ-მა და უკრაინამ ხელი მოაწერეს წიაღისეულის შეთანხმებას და საინვესტიციო ფონდის შექმნაზე შეთანხმდნენ. ამის შესახებ აშშ-ის სახაზინო დეპარტამენტი და უკრაინის პირველი ვიცე-პრემიერი იულია სვირიდენკო აცხადებს.
„აშშ-ის ხაზინის მდივან სკოტ ბესანტთან ერთად ხელი მოვაწერე შეთანხმებას აშშ-უკრაინის აღდგენის საინვესტიციო ფონდის შექმნის შესახებ“, - განაცხადა სვირიდენკომ.
„შეერთებული შტატები ვალდებულია, ხელი შეუწყოს ამ სასტიკი და უაზრო ომის დასრულებას. ეს შეთანხმება რუსეთს მკაფიო სიგნალს უგზავნის, რომ ტრამპის ადმინისტრაცია ერთგულია სამშვიდობო პროცესისა, რომელიც გრძელვადიან პერსპექტივაში თავისუფალ, სუვერენულ და აყვავებულ უკრაინაზეა ორიენტირებული. პრეზიდენტმა ტრამპმა ამერიკელ ხალხსა და უკრაინელ ხალხს შორის ეს პარტნიორობა წარმოადგინა, როგორც ორივე მხარის ერთგულების დემონსტრირება უკრაინაში ხანგრძლივი მშვიდობისა და კეთილდღეობის მიმართ. და, მკაფიოდ რომ ვთქვათ, არცერთ სახელმწიფოს ან ფიზიკურ პირს, რომელმაც დააფინანსა ან ამარაგებსა რუსულ სამხედრო მანქანას, არ ექნება უფლება ისარგებლოს უკრაინის რეკონსტრუქციით,“- განაცხადა ბესენტმა.
სვირიდენკომ ჩამოთვალა წიაღისეულის შესახებ შეთანხმების ძირითადი დებულებები:
• ყველა რესურსი უკრაინის საკუთრებაში რჩება - ეს ხელშეკრულებით არის გათვალისწინებული.
• საინვესტიციო ფონდი იქმნება 50/50-ის პრინციპით. უკრაინა და ამერიკის შეერთებული შტატები ერთობლივად მართავენ ფონდს. არცერთ მხარეს არ ექნება დომინანტური ხმა.
• შეთანხმება არ ითვალისწინებს სახელმწიფო საკუთრებაში არსებული კომპანიების პრივატიზაციის პროცესებში ან მართვაში ცვლილებებს - ისინი კვლავ უკრაინის საკუთრებაში დარჩება. ისეთი კომპანიები, როგორიცაა „უკრნაფტა“ და „ენერგოატომი“, სახელმწიფო საკუთრებაში რჩებიან.
• შეთანხმებაში არ არის ნახსენებიშეერთებული შტატების წინაშე არსებული უკრაინის ვალდებულებების შესახებ.
• შეთანხმება შეესაბამება კონსტიტუციას და არ ცვლის ევროპული ინტეგრაციის კურსს.
• დოკუმენტი შეესაბამება ეროვნულ კანონმდებლობას და არ ეწინააღმდეგება უკრაინის არცერთ საერთაშორისო ვალდებულებას.
• ფონდი შეივსება ექსკლუზიურად ახალი ლიცენზიებიდან მიღებული შემოსავლით.ეს ეხება კრიტიკული მასალებისა და ნავთობისა და გაზის სექტორებში პროექტებისთვის ახალი ლიცენზიებიდან მიღებული თანხების 50%-ს, რომელიც ფონდის შექმნის შემდეგ ბიუჯეტში გადაირიცხება. ფონდში არ შედის უკვე დაწყებული პროექტებიდან ან დაგეგმილი ბიუჯეტის შემოსავლები.
ფონდის ფუნქციონირება მხოლოდ საბიუჯეტო კოდექსში ცვლილებების შეტანას მოითხოვს. თავად შეთანხმება რატიფიცირებული უნდა იყოს უმაღლესი რადას მიერ.
• შეერთებული შტატები სააგენტო DFC (Development Finance Corporation)-ის მეშვეობით უკრაინას ინვესტიციების, ტექნოლოგიებისა და ინოვაციების მოზიდვაში დაეხმარება.
• ფონდის შემოსავალი და შენატანები არ იბეგრება არც აშშ-ში და არც უკრაინაში.
„აშშ-ს ფონდში შეაქვს წვლილი. თანხების გარდა, მათ ასევე შეუძლიათ ახალი დახმარების გაწევა - მაგალითად, უკრაინისთვის საჰაერო თავდაცვის სისტემებით. ჩვენ ველით, რომ ფონდის მოგება და შემოსავალი პირველი 10 წლის განმავლობაში არ განაწილდება, არამედ მხოლოდ უკრაინაში - ახალ პროექტებში ან რესტავრაციაში იქნება ინვესტირებული. ეს პირობები დამატებით იქნება განხილული,“, - განაცხადა სვირიდენკომ.
