გაერო-ს უშიშროების საბჭომ მიიღო შეერთებული შტატების რეზოლუცია "გზა მშვიდობისაკენ", რომელიც მოითხოვს უკრაინაში ომის სწრაფ დასრულებას, მაგრამ არ ასახელებს რუსეთს აგრესორად.
ორშაბათს, 24 თებერვალს გამართულ კენჭისყრაზე დოკუმენტს მხარი დაუჭირა უშიშროების საბჭოს 15 წევრიდან 10-მა - რუსეთმა, შეერთებულმა შტატებმა და ჩინეთმა.
ხუთმა ქვეყანამ, მათ შორის მისმა მუდმივმა წევრებმა ბრიტანეთმა და საფრანგეთმა, თავი შეიკავეს ხმის მიცემისგან.
უკრაინაში ომის დაწყების შემდეგ ეს პირველი შემთხვევაა, როცა გაერო-ს უშიშროების საბჭომ რეზოლუციის მიღება შეძლო.
რუსეთის წარმომადგენელმა გაეროში ვასილი ნებენზიამ მას უწოდა ამოსავალი წერტილი მშვიდობიანი მოგვარებისკენ შემდგომი ძალისხმევისთვის.
მანამდე გაერო-ს გენერალურმა ასამბლეამ მიიღო ორი რეზოლუცია, რომლებიც განსხვავებულად აფასებდნენ რუსეთის ომს უკრაინის წინააღმდეგ.
პირველი დოკუმენტი უკრაინამ და ევროკავშირის ქვეყნებმა შეადგინეს.
ის შეიცავს პირდაპირ მოთხოვნას, რომ რუსეთმა დაუყოვნებლივ გაიყვანოს თავისი ჯარები უკრაინის ოკუპირებული ტერიტორიებიდან და შეწყვიტოს საომარი მოქმედებები, რაც შეესაბამება გაერო-ს ადრე მიღებულ გადაწყვეტილებებს.
მას მხარი 93-მა სახელმწიფომ დაუჭირა, 65-მა თავი შეიკავა, 18-მა წინააღმდეგი იყო, მათ შორის რუსეთუ და შეერთებული შტატები.
მეორე რეზოლუცია შეერთებულმა შტატებმა მოამზადა. ის არ გმობს რუსეთის ფედერაციის სამხედრო აგრესიას, ომს უწოდებს "კონფლიქტს", არ არის ნახსენები რუსეთის მიერ მიტაცებული უკრაინის ტერიტორიები, რუსეთის ფედერაციის მიერ საერთაშორისო სამართლის დარღვევა, ან ქვეყნის ტერიტორიული მთლიანობის აღდგენის აუცილებლობა.
ევროპული ქვეყნების ინიციატივით რეზოლუციის პროექტში შეიტანეს ცვლილებები, რის შემდეგაც მასში გაჩნდა ჩანაწერი უკრაინის ტერიტორიული მთლიანობის და „სამართლიანი მშვიდობის“ მიღწევის შესახებ. დოკუმენტს მხარი დაუჭირა 93 სახელმწიფომ, 72 ქვეყანამ, მათ შორის აშშ-მა და უკრაინამ, თავი შეიკავეს. რუსეთმა ხმა წინააღმდეგ მისცა.
