სატრანსპორტო ქსელის ოპტიმიზაციის, მგზავრობის ხასიათის, მგზავრთნაკადის, ჩვენი მოქალაქეების სამგზავრო ჩვევის ანალიზის ჩასატარებლად ოთხშაბათიდან ე.წ. "შინამეურნეობის კვლევა" განხორციელდება.
აღნიშნულის მისაღწევად თბილისის მერიასა და საფრანგეთის მთავრობას შორის გაფორმებული მემორანდუმის ფარგლებში, ფრანგული მხარის დაფინანსებით, ფრანგულ კომპანია შIშთღA-ს "შინამეურნეობის კვლევის" ორგანიზება დაევალა.
თბილისის მასშტაბით 8000 ოჯახი გამოიკითხება, რასაც კომპანია IPM 24 იანვრიდან აპრილამდე განახორციელებს. ოჯახები საცხოვრებელ აგილზე ნახევარი საათის განმავლობაში გამოიკითხებიან. იმ პირებს, ვინც გამოკითხვას განახორციელებს, შესაბამისი სამკერდე ნიშნები ექნებათ. კითხვები ოჯახის სამგზავრო ქცევას შეეხება.
ინფორმაციის ანალიზი სრული ანონიმურობის დაცვით განხორციელდება.
როგორც მერიის საქალაქო სატრანსპორტო სამსახურის უფროსმა აკაკი ჯოხაძემ "ჯი-ეიჩ-ენთან" კომენტირებისას განმარტა, თბილისში უპრეცენდენტო სამუშაოები ჩატარდება და ზოგადად, ქალაქს ტრანსპორტის განვითარების ხედვა ექნება.
"ამ სამუშაოების ჩატარების შემდეგ შესაძლებელი იქნება, ქალაქმა მოახდინოს არსებული ქსელების როგორც სახელმწიფო, ისე კერძო ტრანსპორტის გადაადგილების ოპტიმიზაცია. ასევე, მომავალი გეგმების სწორად განსაზღვრა, რაც ხელს შეუწყობს ქალაქს ხარჯების ოპტიმალურად დახარჯვის საქმეში,"_განმარტავს ჯოხაძე.
მისივე განმარტებით, "სისტა" სატრანსპორტო დაგეგმვის კუთხით მსოფლიო ლიდერია. მათი დახმარება ორ საფეხურს მოიცავს. პირველი საფეხურია_მოსახლეობის გამოკითხვა-კვლევა, ხოლო მეორე_ტექნიკურ-ეკონომიკიური პროექტის მომზადება გარემოს ზემოქმედებითი და ფინანსური შედეგის გასარკვევად. ამ სამუშაოების შემდეგ მუნიციპალიტეტი გამოაცხადებს ტენდერს სატრანსპორტო სფეროს მოწესრიგება-ოპტიმიზაციის მიზნით. სისტას მიერ განხორციელებული პროექტის ღირებულება მილიონი დოლარია.
ცნობისთვის, როგორც თბილისის მერიის საქალაქო სატრანსპორტო სამსახურში განმარტავენ, სისტა სატრანსპორტო დაგეგმარების კუთხით მსოფლიო ლიდერია. მის სისტემაში საფრანგეთის რკინიგზა, პარიზის მეტრო და ბანკები შედის.
შეგახსენებთ, მსგავსი კვლევა ნებისმიერ ევროპულ და ჩრდილოამერიკულ დედაქალაქში ხუთ წელიწადში ერთხელ ტარდება.