აფხაზეთისა და ცხინვალის რეგიონისთვის ოკუპირებულად აღიარების პროცესი წარმატებით გავლა რეგიონების აღიარების საკითხს მთლიანად შეაჩერებს.
ამის შესახებ "ჯი-ეიჩ-ენს" ექსპერტმა ირაკლი სესიაშვილმა ევროპარლამენტის რეზოლუციის შეფასებისას განუცხადა.
"2008 წლის აგვისტოს ომის შემდეგ პირველ ეტაპზე მთავარი ამოცანა აფხაზეთის და ცხინვალის რეგიონის აღიარებითი პროცესის შეჩერება იყო, ხოლო მეორე _ საერთაშორისო სამართლის ნორმებით დადასტურება, რომ ეს ტერიტორიები უცხო ქვეყნის მიერ არის მიტაცებული და ოკუპირებული. ჩვენ თუ ამ პროცესს მშვიდობიანად, ეფექტურად ჩავივლით, საშუალება მოგვეცემა აღიარების პროცესი მთლიანად შევაჩეროთ, მეორე მხრივ გადაიდგას შემდგომი ნაბიჯები დეოკუპაციისთვის, რაც მარტივი საქმე არ არის", - აღნიშნა სესიაშვილმა.
მისივე შეფასებით, დედამიწაზე ძალიან ბევრი კონფლიქტია, სადაც საერთაშორისო საზოგადებას ღიად აქვს კონკრეტული მხარის ბრალეულობა აღიარებული, თუმცა მათი ნორმალურ ფარგლებში მოგვარება ვერ ხერხდება.
"ამის გათვალისწინებით, კი ძნელი სათქმელია დეოკუპაციის პროცესი რამდენად ეფექტურად განვითრდება, რადგან არის კონფლიქტები სადაც ყველა ხედავს ვინ არის მართალი და ვინ მტყუანი, თუმცა მიუხედავად ამისა ვითარების სამართლიან ჩარჩოებში მოთავსება ძნელია, რადგან, რომელიმე მხარე პოზიციებს არ თმობს", - დასძინა სესიაშვილმა "ჯი-ეიჩ-ენთან" საუბრისას.
ამასთან, ექსპერტს მიაჩნია, რომ ამ შემთხვევაში რუსეთთან მიმართებაში სიტუაცია კიდევ უფრო რთულია, რადგან იგი გაეროს უშიშროების წევრია და ვეტოს უფლება აქვს, მეორე მხრივ კი, ძალიან ძლიერი სახელმწიფოა, ფლობს ბირთვულ იარაღს და მის წინააღმდეგ თუნდაც სანქციების გატარება და საქართველოს ტერიტორიებიდან ძალით გასვლის იძულება ვერ მოხდება.
"გასათვალისწინებელია ის ფაქტიც, რომ რუსეთი პირდაპირ ერთ ქვეყანაშია წარმოდგენილი როგორც ოკუპანტი და ჩვენ გამოცდილებაც არ გვაქვს როგორ შეიძლება მოვიქცეთ", - აღნიშნა მან.
შეგახსენებთ, რომ გუშინ ევროპარლამენტმა შავი ზღვის ქვეყნებთან მიმართებაში რეზოლუცია მიიღო, სადაც აფხაზეთის და ცხინვალის რეგიონი ოკუპირებულ ტერიტორიებად არის მოხსენებული. ასევე, დოკუმენტში საუბარია, რომ საქართველოს ოკუპირებულ ტერიტორიებზე ადამიანის უფლების დარღვევა თითქმის ყოვლდღიურად ხდება.
