„უცხოეთის გავლენის გამჭვირვალობის კანონის“ საწინააღმდეგო აქციის მონაწილეები პარლამენტიდან ევროკავშირის წარმომადგენლობის ოფისთან მსვლელობით გაემართნენ.
რა დროსაც საპარლამენტო უმრავლესობის წევრისა და პარტია " ხალხის ძალის" წარმომადგენლის, დავით კაჭარავას ავტომობილი მსვლელობის შუაგულში აღმოჩნდა.
დემონსტრანტებმა კაჭარავა გააჩერეს და საჯაროდ სთხოვეს, ტელეეთერების მეშვეობით კანონი ერთად განეხილათ. დეპუტატი გადმოვიდა მანქანიდან და შეკრებილებს უთხრა, რომ "ეს კანონი ქართულია".
"ეს კანონი არის ქართული და ემსახურება საქართველოს ინტერესებს, ესაა მეტი დამოუკიდებლობა საქართველოსთვის, მეტი დამოუკიდებლობა ავტომატურად ნიშნავს მეტ პასუხისმგებლობას ჩვენი ხელისუფლებისთვის. ამიტომ ჩვენ ამ გზაზე ვივლით და ყოველდღიურად გავხდებით უფრო მეტად დამოუკიდებელი და მიგვიღებენ ევროკავშირში ამაყად, ჩვენი ფასეულობებით. ახლა კარგად ბრძანდებოდეთ", - მიმართა მან აქციის მონაწილეებს და პატრულის დახმარებით დატოვა მსვლელობის ტერიტორია.
