საქართველო წარმოადგენს გერმანიისთვის ძალიან მნიშვნელოვან და სანდო პარტნიორს ამ, გეოპოლიტიკურად რთულ რეგიონში. საქართველო განსაკუთრებულ როლს ასრულებს ჩვენს რეგიონში, სამხრეთ კავკასიის რეგიონში მშვიდობისა და სტაბილურობის დამყარების პროცესში, რაც რეგიონის ყველა ქვეყნის ინტერესებშია, - ამის შესახებ საქართველოს პრემიერ-მინისტრმა ირაკლი კობახიძემ გერმანიის ფედერალურ კანცლერ ოლაფ შოლცთან ერთად გამართულ პრესკონფერენციაზე განაცხადა.
როგორც მთავრობის მეთაურმა აღნიშნა, საქართველოსა და გერმანიას მრავალგანზომილებიანი თანამშრომლობა აკავშირებთ, რომელიც ფაქტობრივად ყველა სფეროს მოიცავს.
„ჩვენ ასევე ვისაუბრეთ გერმანია-საქართველოს ორმხრივ ურთიერთობებზე და კმაყოფილებით დავაფიქსირეთ, რომ ამ წლების განმავლობაში პარტნიორობამ და თანამშრომლობამ ჩვენს ქვეყნებს შორის მიიღო მრავალგანზომილებიანი ხასიათი, რომელიც ფაქტობრივად ყველა სფეროს მოიცავს. ვისაუბრეთ ასევე სხვადასხვა სექტორებზე, განსაკუთრებით ცალკეულ სფეროებში ბოლო პერიოდში მიღწეულ წარმატებებზე, პირველ რიგში სამართალდაცვით სფეროში, განათლების, კულტურის, მეცნიერების სფეროებში.
გერმანიასა და საქართველოს შორის ძალიან მჭიდრო თანამშრომლობა არსებობს, გერმანია ერთ-ერთი წამყვანი ქვეყანაა საქართველოსთან ვაჭრობისა და ეკონომიკის სფეროში. საქართველოში არაერთი გერმანული კომპანია ოპერირებს წარმატებულად და ჩვენ ვისაუბრეთ ასევე იმ ნაბიჯებზე, რომელიც იქნება გადასადგმელი იმისთვის, რომ გერმანიის ეკონომიკის სექტორი უფრო დავაინტერესოთ საქართველოს სატრანზიტო და ეკონომიკური შესაძლებლობებით,“- აღნიშნა ირაკლი კობახიძემ.
