დღეს, გერმანიის ქალაქ მიუნჰენში აზერბაიჯანისა და სომხეთის პრეზიდენტების ილჰამ ალიევისა და სერჟ სარქისიანის შეხვედრა გაიმართება.
როგორც ექსპერტები მიიჩნევენ, შეხვედრა მეტად დაძაბულ ვითარებაში წარიმართება, რასაც ილჰამ ალიევის მიერ 20 ნოემბერს გაკეთებული განცხადება განაპირობებს.
როგორც ცნობილია, ალიევმა განაცხადა, რომ იმ შემთხვევაში თუ დღევანდელი შეხვედრა მთიანი ყარაბაღის პრობლემის დარეგულირებასთან დაკავშირებით უშედეგოდ დასრულდება, შესაძლოა რეგიონში სამხედრო მოქმედებები განახლდეს.
"თუ ეს შეხვედრა უშედეგო იქნება, მაშინ ჩვენი იმედები მოლაპარაკებებთან დაკავშირებით ამოიწურება და ამ შემთხვევაში ჩვენ სხვა გზა არ დაგვრჩება. ჩვენ ამისთვის (აზერბაიჯანული მიწების საომარი მოქმედებებით განთავისუფლებისთვის) მზად უნდა ვიყოთ", - განაცხადა ალიევმა.
მისივე თქმით, ქვეყნის თავდაცვის სფეროში თავდაცვის მშენებლობის კუთხით ბოლო წლების განმავლობაში ჩატარებული სამუშაობი "კონკრეტულ მიზანს ემსახურებოდა".
"ჩვენ ვხარჯავთ მილიარდობით სახსრებს, ვყიდულობთ ახალ იარაღს, ტექნიკას და ვამაგრებთ ჩვენს პოზიციებს ურთიერთშეხების ხაზზე. ჩვენ ამას ვაკეთებთ იმისთვის, რომ არასდროს გამოგვირიცხავს და არც არასდროს გამოვრიცხავთ აღნიშნულ ვარიანტს. ჩვენ გვაქვს სრული უფლება ეს მიწები სამხედრო ძალით გავათავისუფლოთ. საერთაშორისო სამართალი ჩვენს ამ უფლებას აღიარებს", - განაცხადა ალიევმა.
გარდა ამისა, ალიევის შეფასებით, მთიანი ყარაბაღის საკითხთან დაკავშირებით დღემდე გამართულ მოლაპარაკებებს არანაირი შედეგი არ მოუტანია, რის კონტექსტშიც, მიუნჰენის შეხვედრა იქნება გადამწყვეტი.
ამავდროულად, ვრცელდება ინფორმაცია, რომ ალიევის განცხადებამ გარკვეული შეშფოთება გამოიწვია, როგორც ერევანში, ისე ვაშინგტონში. უცხოურ მედიაში გავრცელებული ინფორმაციით, ვაშინგტონმა აზერბაიჯანს მკაცრი ულტიმატუმი წაუყენა და მიუთითა, რომ თუ ბაქო მთიან ყარაბაღში სამხედრო ოპერაციას დაიწყებს, აშშ მის დამოუკიდებლობას აღიარებს.
ილჰამ ალიევის ოპონენტები კი აღნიშნავენ, რომ ვაშინგტონმა სახელმწიფო მდივნის თანაშემწის თინა კაიდენაუს მეშვეობით რეაგირება მოახდინა ოფიციალური ბაქოს მიერ გაკეთებულ განცხადებებზე და უფრო მეტიც, ამერიკელები ადასტურებენ, რომ მათ გააჩნიათ ინფორმაცია აზერბაიჯანის მიერ სამხედრო მზადების შესახებ.
ამავდროულად, აზერბაიჯანის საგარეო უწყების პრესსამსახურის ხელმძღვანელმა ელჰამ პალუხოვმა განაცხადა, რომ მისთვის არაფერია ცნობილი ვაშინგტონის გეგმების შესახებ ყარაბაღთან დაკავშირებით და დასძინა, რომ "აზერბაიჯანი არ არის ის ქვეყანა, რომელთანაც შესაძლებელია ულტიმატუმის ენით საუბარი".
"ჩვენ ვატარებთ დამოუკიდებელ საგარეო პოლიტიკას, რომელიც ჩვენს ნაციონალურ ინტერესებს ეფუძვნება", - განმარტა მან.