დღეს, 22 ნოემბერს, კვიპროსის დედაქალაქ ნიქოზიაში ქართული სათვისტომოს ყრილობა გაიმართება. როგორც "ჯი-ეიჩ-ენს" კვიპროსის რესპუბლიკაში საქართველოს საგანგებო და სულუფლებიანმა ელჩმა ვლადიმერ კონსტანტინიდმა განუცხადა, სათვისტომო ხელმძღვანელ ორგანოებსა და თავმჯდომარეს აირჩევს.
"კვიპროსის რესპუბლიკაში ქართული სათვისტომო დიდი ხანია არსებობს, მაგრამ ის იურიდიულად არ იყო გაფორმებული. ამჟამად სათვისტომოს რეგისტრაცია ოფიციალურად დასრულებულია და კვიპროსში მცხოვრები ქართველები სათვისტომოს ხელმძღვანელ ორგანოებსა და თავმჯდომარეს აირჩევენ", - განუცხადა "ჯი-ეიჩ-ენს" ვლადიმერ კონსტანტინიდმა.
ელჩის განცხადებით, გაიმართება მსჯელობა სათვისტომოსა და ქვეყენაში მცხოვრები ქართველების საქმიანობის გააქტიურებაზე მთელი რიგი მიმართულებებით, კერძოდ ღალიის ღვთისმშობლოს მონასტრის აღდგენიის ფონდთან დაკავშირებით, ასევე საკვირაო სკოლების ფუნქციონირებასა და სხვა აქტუალურ საკითხებზე.
მისივე თქმით, სათვისტომოს შეკრების ოფიციალური ნაწილის დასრულების შემდგომ დაგეგმილია კულტურული პროგრამა.
"კვიპროსში მცხოვრები ქართველები ქალაქების მიხედვით წარმოადგენენ თავიანთ შემოქმედებას. როგორც ვიცი ყველანი ძალიან სერიოზულად ემზადებიან. შესაბამისად, 22 ნოემბერს ქართული ცეკვები და სიმღერები აქ მცხოვრებ ქართველობას არა მხოლოდ ნოსტალგიას მომენტს გაუმძაფრებს, არამედ გარკვეული სიმაყითაც აღავსებს და ქართული კულტურის მეშვეობით კიდევ ერთხელ მოაფერებს საკუთარ სამშობლოს", _ განუცხადა "ჯი-ეიჩ-ენს" კვიპროსის რესპუბლიკაში საქართველოს საგანგებო და სულუფლებიანმა ელჩმა ვლადიმერ კონსტანტინიდმა.
