რუსეთის თავდაცვის სამინისტრო ადასტურებს, რომ ხანძარი გაჩნდა შავი ზღვის ფლოტის ფლაგმან კრეისერ "მოსკვაზე".
სააგენტო "ტას"-ი, თავდაცვის სამინისტროზე დაყრდნობით წერს, რომ ხანძარი საბრძოლო მასალის აფეთქების შედეგად გაჩნდა.
იუწყებიან, რომ კრეისერი "სერიოზულად დაზიანდა", განხორციელდა "ეკიპაჟის სრული ევაკუაცია.
მანამდე, უკრაინის ხელისუფლებამ განაცხადა, რომ კრეისერს ორი უკრაინული ხომალდსაწინააღმდეგო რაკეტა "ნეპტუნი" მოხვდა.
13 აპრილის საღამოს, ოდესის ოლქის ადმინისტრაციის ხელმძღვანელმა მაქსიმ მარჩენკომ ტელეგრამის არხზე განაცხადა, რომ უკრაინის დამცველები თავს დაესხნენ რუსულ კრეისერს და "სერიოზულად დააზიანეს" რაკეტებით "ნეპტუნი".
კრეისერზე თავდასხმის შესახებ გამოცემა "უკრაინსკაია პრავდა" სადაზვერვო წყაროებზე დაყრდნობითაც იუწყება. გავრცელებული ცნობით, ბორტზე დაახლოებით 500-დან 700-მდე ეკიპაჟის წევრი ირიცხებოდა.
"მოსკვა" რუსეთის შავი ზღვის ფლოტის ფლაგმანია. 2015 წელს კრეისერი ხელმძღვანელობდა რუსეთის საზღვაო ძალების ჯგუფს ხმელთაშუა ზღვაში სირიაში სამხედრო კამპანიის დროს.
უკრაინული მედიის ინფორმაციით, სწორედ ეს კრეისერი მონაწილეობდა კუნძულ ზმეინის დაპყრობის მცდელობის ოპერაციაში, რა დროსაც რუსული ხომალდი უკრაინელმა მესაზღვრეებმა "ნახ....ზე გაუშვეს".
