საფრანგეთი არ აღიარებს ოკუპირებულ ცხინვალის რეგიონში ჩატარებულ "არჩევნებს".
როგორც საქართველოში საფრანგეთის საელჩოს მიერ გავრცელებულ ინფორმაციაშია აღნიშნული, უკრაინის წინააღმდეგ რუსეთის საომარი აგრესიის კონტექსტში, რაც სერიოზულ ზიანს აყენებს ევროპის კონტინენტის უსაფრთხოებასა და სტაბილურობას, საფრანგეთი მტკიცედ ადასტურებს თავის სრულ მხარდაჭერას საქართველოს ტერიტორიული მთლიანობისა და სუვერენიტეტის მიმართ მის საერთაშორისოდ აღიარებულ საზღვრებში.
"სამხრეთ ოსეთისა და აფხაზეთის სეპარატისტულ ტერიტორიებზე ჩატარებული ნებისმიერი არჩევნები ან მიღებული გადაწყვეტილება, რომელიც ხელყოფს საქართველოს ტერიტორიულ მთლიანობას, ეწინააღმდეგება საერთაშორისო სამართალს და საფრანგეთის მიერ მიჩნეული იქნება უკანონოდ და ბათილად.
საფრანგეთი არის საქართველოს გვერდით, რათა ხელი შეუწყოს მშვიდობიანი და აყვავებული სამხრეთ კავკასიის შენებას", - განმარტებულია საელჩოს მიერ გავრცელებულ ინფორმაციაში.
