"საქართველოს პარლამენტის წევრის სტატუსის შესახებ" საქართველოს კანონის თანახმად, ადგილობრივი თვითმმართველობის ორგანოები ვალდებულნი არიან პარლამენტის წევრი უზრუნველყონ შესაბამისი ტექნიკური საშუალებებით, რაც გულისხმობს ადგილობრივი თვითმმართველობის ორგანოების მიერ შესაბამისი მომსახურების შესყიდვასა და პარლამეტის წევრისათვის გადაცემას. ხარაგარულის მუნიციპალიტეტის ბიუჯეტიდან კი შესაბამისი მომსახურების შესყიდვის ნაცვლად პარლამენტის წევრს ყოველთვიურად გადაეცემა 833 ლარი, მიუხედავად იმისა, არსებობს თუ არა შესაბამისი საჭიროება", - ნათქვამია "რესპუბლიკური პარტიის" პრესსამსახურის მიერ გავრცელებულ განცხადებაში.
მასში ასევე აღნიშნულია, რომ "თუ მუნიციპალური ბიუჯეტიდან პირდაპირ არის გათვალისწინებული პარლამენტის წევრის ამომრჩეველთან ურთიერთობის მიზნით გაწეული ხარჯების ასანაზღაურებელი თანხა, მაშინ უნდა არსებობდეს შესაბამისი ხარჯების დამადასტურებელი დოკუმენტი, რაც ხარაგაულის მუნიციპალიტეტის შესაბამის სამსახურებში არ მოიპოვება".
ცნობისთვის, "საქართველოს პარლამენტის წევრის სტატუსის შესახებ" საქართველოს კანონის 32-ე მუხლის თანახმად, ადგილობრივი თვითმმართველობის ორგანოების, პარლამენტის წევრის მოთხოვნის შემთხვევაში, ვალდებულნი არიან უზრუნველყონ იგი სამუშაო ოთახით, ადმინისტრაციულ საზღვრებში გადასაადგილებლად სატრანსპორტო საშუალებით და კავშირგაბმულობის საშუალებით.
გარდა ამისა, "საქართველოს პარლამენტის წევრის ამომრჩევლებთან ურთიერთობის გაუმჯობესების ღონისძიებათა შესახებ" საქართველოს პარლამენტის დადგენილების შესაბამისად მაჟორიტარული საარჩევნო სისტემით არჩეულ პარლამენტის წევრს (გარდა თვითმმართველო ქალაქებში არჩეული მაჟორიტარი პარლამენტის წევრებისა) ამომრჩევლებთან ურთიერთობისა და მაჟორიტარი პარლამენტის წევრის ბიუროს მატერიალურ-ტექნიკური უზრუნველყოფისათვის პარლამენტის ბიუჯეტიდან ყოველთვიურად გამოეყოფა 1070 ლარი, ხოლო თვითმმართველ ქალაქში არჩეულ მაჟორიტარ პარლამენტის წევრს - 1400 ლარი.
