კრემლი შიშობს, რომ უკრაინაში სრულმასშტაბიანი საბრძოლო მოქმედებები განახლდება, რაც საფრთხეს შეუქმნის რუსეთის ფედერაციის უსაფრთხოებას. ამის შესახებ პარასკევს რუსეთის პრეზიდენტის პრესმდივანმა დმიტრი პესკოვმა განაცხადა.
"კრემლში არსებობს შიში, რომ უკრაინაში სამოქალაქო ომი განახლდება. და თუ ჩვენს საზღვრებთან განახლდება სამოქალაქო ომი და სრულმასშტაბიანი საბრძოლო მოქმედებები, ეს საფრთხეს შეუქმნის რუსეთის ფედერაციის უსაფრთხოებას. ამ ვითარების განვითარების დინამიკა და მთლიანად უკრაინული მხარის ქცევის დინამიკა ქმნის სრულფასოვანი საომარი მოქმედებების განახლების საშიშროებას. უკრაინული მხარე სრულად არ უარყოფს სამხრეთ-აღმოსავლეთით საკუთარი პრობლემის სამხედრო გადაწყვეტის იდეას", - თქვა პესკოვმა.
პესკოვის თქმით, ახლა დონბასში საგანგებო არასტაბილური მდგომარეობაა.
"[უკრაინაში] საბრძოლო მოქმედებების დაწყების და იქ ადამიანური კატასტროფის პოტენციური განმეორების შემთხვევაში, მსოფლიოს არცერთი ქვეყანა განზე არ დადგება. და ყველა ქვეყანა, მათ შორის რუსეთი, მიიღებენ ზომებს, რომ ასეთი ტრაგედიები აღარ განმეორდეს", - დასძინა პესკოვმა.