Associated Press-მა COVID-19-ის წარმოშობის შესახებ ჯანმოსა და ჩინეთის ერთობლივი კვლევის შედეგები მოიპოვა.
გამოცემა აღნიშნავს, რომ ვირუსის გადაცემა ღამურებიდან ადამიანებზე სხვა ცხოველის საშუალებით ყველაზე სავარაუდო სცენარია. მისი ხელოვნური წარმოშობა კი "უკიდურესად ნაკლებად სავარაუდო".
ანგარიშის გამოქვეყნება არაერთხელ გადაიდო, რაც კითხვებს აჩენს იმის შესახებ, ცდილობდა თუ არა ჩინური მხარე დასკვნების დამალვას.
Associated Press-მა კვლევის შედეგები ჟენევაში მყოფ დიპლომატისგან მოიპოვა, რომელიც ჯანმრთელობის მსოფლიო ორგანიზაციაში ერთ-ერთი სახელმწიფოს წარმომადგენელია.
გავრცელებული ცნობით, კვლევის შედეგებში ვირუსის წარმოშობის 4 სცენარია განხილული. სცენარების სიის სათავეშია ვირუსის ღამურისგან ადამიანზე გადადება შუამავალი ცხოველის მეშვეობით, ანუ ვირუსი ღამურისგან ჯერ სხვა ცხოველს, შემდეგ კი ადამიანს გადაედო.
ერთ-ერთი სცენარად ასევე განხილულია ვირუსის ღამურებისგან ადამიანზე პირდაპირი გადაცემის ვარიანტი.
"მსგავსი ვირუსები აღმოაჩინეს პანგოლინებში, თუმცა აღსანიშნავია, რომ რომ წაულები და კატები მგრძნობიარენი არიან COVID ვირუსის მიმართ. ეს კი მიანიშნებს, რომ ისინი შეიძლება იყვნენ მატარებლები", - იტყობინება Associated Press-ი კვლევის შედეგებზე დაყრდნობით.
2021 წლის თებერვალში New York Times-სთან ინტერვიუში ჯანმრთელობის მსოფლიო ორგანიზაციის საერთაშორისო ექსპერტთა ჯგუფის წევრმა, პიტერ დაშაკმა, რომელიც WHO-ს მანდატით ჩინეთის ქალაქ უხანში იმყოფებოდა ვირუსის წარმოშობის შესასწავლად, განაცხადა, რომ სავარაუდოდ კორონავირუსი პირველად ცხოველებში გაჩნდა ჩინეთში, ან სამხრეთ-აღმოსავლეთ აზიაში.
პიტერ დაშაკის თქმით, სავარაუდოდ, კორონავირუსი პირველად ღამურებს გაუჩნდათ, საიდანაც გადაედოთ მოშინაურებულ გარეულ ცხოველებს, ხოლო მათგან შესაძლოა ვირუსი ცხოველთა ფერმების თანამშრომლებს და მოგვიანებით, უხანის ბაზრიდან დაკლული ინფიცირებული ცხოველის ხორცით ადამიანებს გადასდებოდათ.
საერთაშორისო ექსპერტები, ისევე როგორც ჩინეთი, მიიჩნევენ, რომ აღნიშნული ვერსია ყველაზე სავარაუდოა. მეორე მხრივ, ექსპერტებმა უარყვეს დაუდასტურებელი თეორია იმის შესახებ, რომ ვირუსი ლაბორატორიაში შეიქმნა და განაცხადეს, რომ ეს თეორია შემდგომ შესწავლასაც არ იმსახურებს.
ექსპერტთა ჯგუფი ჩინეთში ვიზიტის ფარგლებში ეწვია უხანის ზღვის პროდუქტების ბაზარს, საიდანაც პირველი ვარაუდით გავრცელდა კორონავირუსი. ექსპერტები ასევე გაესაუბრნენ ექიმებს, რომლებიც კორონავირუსით ინფიცირებულ პირველ პაციენტებს მკურნალობდნენ.
პიტერ დაშაკმა ასევე აღნიშნა, რომ მათ ვერ შეძლეს მოეპოვებინათ პირადი მონაცემები იმ პაციენტებისა, რომლებიც კორონავირუსით დაინფიცირდნენ და ვერც მათთან გასაუბრების შესაძლებლობა მიეცათ.
მანამდე, ჩინეთის ხელისუფლებამ უარყო ჯანმრთელობის მსოფლიო ორგანიზაციის მოთხოვნა მიეღოთ ინფორმაცია 174 პაციენტის შესახებ, რომელთაც ეპიდემიის აფეთქების ადრეულ ეტაპზე დაუდასტურდათ კორონავირუსი.
ჯანმრთელობის მსოფლიო ორგანიზაციასა და პეკინს შორის კორონავირუსის წარმოშობის კვლევის ჩატარებაზე მოლაპარაკებები რამდენიმე თვის წინ დაიწყო, მაგრამ ძალიან ნელა მიმდინარეობდა.
5 იანვარს ჯანმრთელობის მსოფლიო ორგანიზაციის გენერალურმა დირექტორმა, ტედროს ადჰანომ ღებრეიესუსმა ჟენევაში გამართულ ბრიფინგზე განაცხადა, რომ ჩინეთმა ბოლო წუთს უარი თქვა ექსპერტთა ჯგუფის მიღებაზე, რის გამოც რამდენიმე ექსპერტი იძულებული გახდა მგზავრობა შეეწყვიტა. ჩინეთმა თავისი უარი ჯანმო-ს დელეგაციის მიღების საორგანიზაციო საკითხების სირთულეებს მიაწერა.
14 იანვარს, პეკინისგან საბოლოო თანხმობის მიღების შემდეგ საერთაშორისო ჯგუფი 10 ექსპერტის შემადგენლობით უხანში ჩავიდა.
მოელიან, რომ ექსპერტთა ჯგუფის საბოლოო დასკვნა უახლოეს დღეებში გამოქვეყნდება.
