"დიდი შვიდეულის" ქვეყნების ფინანსთა მინისტრების შეხვედრაზე, რუსეთზე ზეწოლის გაძლიერებასა და უკრაინის მხარდასაჭერად ზომების მიღებაზე შეთანხმდნენ.
„რუსეთის მიერ შემდგომი ესკალაციისკენ მიმართული ქმედებები, მათ შორის ნატო-ს საჰაერო სივრცის დარღვევა, მშვიდობიან მოსახლეობაზე თავდასხმების ზრდა და უკრაინაში სამთავრობო და დიპლომატიური შენობების დაზიანება, მიუღებელია და ძირს უთხრის მშვიდობის მიღწევის მცდელობებს“, - ნათქვამია „დიდი შვიდეულის“ ქვეყნების მინისტრების განცხადებაში, რომელიც კანადის მთავრობის ვებგვერდზე გამოქვეყნდა.
აღნიშნულია, რომ დადგა დრო, გაძლიერდეს ზომები, რომლებიც მიზნად ისახავს უკრაინის მდგრადობის გაძლიერებას და რუსეთის ომის წარმოების უნარის კრიტიკულ დონეზე შესუსტებას.
მუშავდება ვარიანტები უკრაინისთვის ფინანსური დახმარებისთვის.
სხვა საკითხებთან ერთად, ეს ეხება „დიდი შვიდეულის“ ქვეყნების იურისდიქციებში გაყინული ყველა რუსული აქტივის გამოყენებას.
მინისტრები ასევე შეთანხმდნენ რუსული ნავთობის ექსპორტზე ზეწოლის მაქსიმალურად გაზრდის აუცილებლობაზე, რომელიც მოსკოვის შემოსავლის მთავარ წყაროს წარმოადგენს.
ასევე მიღებული იქნება ზომები რუსეთიდან პროდუქციის იმპორტის შემცირებისა და თანდათანობითი შეჩერების მიზნით.
