ქართული ოცნების სტილია, ერთი ნაბიჯი წინ და ორი უკან. ტვ პირველში შესვლა იქნება მძიმე დარტყმა კონსტრუქციული საუბრის პერსპექტივისთვის, აცხადებს "ლელოს" წარმომადგენელი ირაკლი კუპრაძე.
მისი განმარტებით, ხელისუფლება მზადყოფნას გამოთქვამს კონსტრუქციულ მოლაპარაკებებზე და პარალელურად დამოუკიდებელ ტელევიზიაში პროკურატურის შესვლას ამზადებს, მსგავსი დესტრუქციული ქმედებები ზიანს აყენებს მოლაპარაკების შესაძლებლობას და ისევ დაძაბულობის საწყის რეჟიმში აბრუნებს პროცესს.
"კანონმდებლობის მიხედვით ჟურნალისტს აქვს უფლება არ გასცეს წყაროს ვინაობა თუ იცის მის შესახებ, არ ითანამშრომლოს წყაროს ვინაობის დადგენის სასარგებლოდ. კანონი იცავს ჟურნალისტებს და ნებისმიერი საწინააღმდეგო იძულება იქნება კანონის უხეში დარღვევა.
მოვუწოდებთ ქართულ ოცნებას, ტვ პირველში შესვლით, ნუ შექმნის დამატებით წინაღობას უმნიშვნელოვანესი მოლაპარაკების პროცესში", აცხადებს ირაკლი კუპრაძე.
