ფუნდამენტური ცვლილება, რაც მოხდა გუშინდელ დღეს ფასილიტაციიდან მედიაციისკენ, ყველამ უნდა გავიგოთ, რას ნიშნავს, - აცხადებს „სტრატეგია აღმაშენებლის“ ლიდერი გიორგი ვაშაძე.
მისი თქმით, ევროკავშირის მხარე აცხადებს, რომ მართლმსაჯულებაში და ანტიკორუფციული მიმართულებით უნდა გატარდეს რეფორმები.
"ფუნდამენტური ცვლილება, რაც მოხდა გუშინდელ დღეს ფასილიტაციიდან მედიაციისკენ, ყველამ უნდა გავიგოთ, რას ნიშნავს. ეს ნიშნავს, რომ არა მარტო მხარეები, არამედ ევროკავშირიც წარმოადგენს შეთანხმების გარკვეულ კომპონენტებს. მეორე მნიშვნელოვანი საკითხი ექვსი პუნქტია, სადაც ერთ-ერთი არის პოლიტიკური პატიმრების საკითხი, მეორე არის რიგგარეშე არჩევნების საკითხი.
რაც შეეხება, რა ტიპის გადაწყვეტილება იქნება, მოვლენებს წინ ნუ გავუსწრებთ. არ ვიცით, ჩვენ ჩვენი მოსაზრებები გვაქვს, დაველოდოთ. რეალობას თვალი უნდა გავუსწოროთ და როცა ასეთ რანგშია აყვანილი მოლაპარაკებები, ეს ნიშნავს, რომ ჩვენ უნდა განვიხილოთ სხვადასხვა ალტერნატიული წინადადება. გახსოვთ, რომ იყო ოთხ პუნქტზე საუბარი, უკვე არის ექვსზე. ევროკავშირის მხარემ თქვა, რომ მათთვის მნიშვნელოვანია, ქვეყანა მუდმივად არ იყოს კრიზისში, არამედ გატარდეს ისეთი რეფორმა მართლმსაჯულებაში და ანტიკორუფციული მიმართულებითაც, რომ ამან შექმნას ფუნდამენტი გრძელვადიანი სტაბილურობისთვის. ჩვენ ამას დავეთანხმეთ", - განმარტავს ვაშაძე.
მისივე თქმით, არანაირი კონკრეტული წინადადება არც „ქართული ოცნებიდან“ და უკვე მედიატორისგან არ მოუსმენია.
"განხილვა იყო იმ ჩარჩოსა და ფორმატზე, რა ფორმატზეც ვმსჯელობთ. ექვსი პუნქტი და ფორმატი, რომელშიც ევროკავშირის მხარე იღებს მედიაციის როლს და არა ფასილიტაციის. ფორმატი, რომელიც ჩემთვის კიდევ უფრო მნიშვნელოვანია, რადგან ევროკავშირის პრეზიდენტი ერთვება თვითონ საკითხის გადაწყვეტაში. ამ საკითხებში იცით, რომ პარლამენტში ძალთა გადანაწილება დამატებულია. ევროკავშირისთვის მნიშვნელოვანია, რომ ვინც არ უნდა იყოს ოპოზიციაში, მას ჰქონდეს გარანტია, შეასრულოს რეალურად ის ფუნქცია, რომელსაც ოპოზიცია უნდა ასრულებდეს, სასამართლოს საკითხი დამატებულია. გარდა ამისა, საარჩევნო რეფორმის საკითხი არის, რომელზეც ჩვენ ვმსჯელობდით. შეთანხმება არა ერთ ან ორ რომელიმე საკითხზე, არამედ ყველა პუნქტთან მიმართებაში უნდა მოხდეს. შეთანხმების გარეშე პარლამენტში შესვლაზე საერთოდ არ ყოფილა საუბარი.
შეთანხმების შემთხვევაში, საკონსტიტუციო ცვლილებებია განსახორციელებელი. რა თქმა უნდა, ამას ჩვენი ხმებიც სჭირდება. არ ვაპირებ გიჟის პოზიცია დავიჭირო და ვთქვა, არა მაინც არ შევალ და არ ვიზამ, საერთოდ არ მაინტერესებს პარლამენტში ჯდომა, რადგან ჩემს თავს საერთოდ სხვაგან ვხედავ გძელვადიან პერსპექტივაში. პირდაპირ გეუბნებით, აღმასრულებელი მიმართულებით ვხედავ, რადგან ჩემი მოწოდებაა დღე და ღამე საქმის კეთება, სირბილი საქართველოში, მსოფლიოში, რომ განვავითაროთ, წინ წავიყვანოთ, ეკონომიკა ავწიოთ, მაგრამ ამისთვის აუცილებელია ფუნდამენტი ჩავასხათ. ფუნდამენტის ჩასხმისთვის კი საკონსტიტუციო ცვლილებებია საჭირო. ექვსივე საკითხზე თუ არ იქნება შეთანხმება, მაშინ ჩვენ პარლამენტში ვერ შევალთ", აცხადებს ვაშაძე.
