"ქართული ოცნება" არის ის პოლიტიკური ძალა, რომელიც ასრულებს მიცემულ პირობებს და აღებულ ვალდებულებებს. ასე ეხმაურება საქართველოს პარლამენტის თავმჯდომარე "ნაციონალური მოძრაობის" თავმჯდომარის საქმესთან დაკავშირებით, საერთაშორისო პარტნიორების განცხადებებს.
თალაკვაძის თქმით, პარტნიორები ყველა პარტიას მოუწოდებენ დაძაბულობის შემცირებისა და სიტუაციის დეესკალაციისკენ.
"საზოგადოება ხედავს, რომ ჩვენი პარტნიორები ყველა პარტიას მოუწოდებენ შევამციროთ დაძაბულობა და მოხდეს სიტუაციის დეესკალაცია, საკითხები გადაწყდეს მოლაპარაკებით და პოლიტიკური დიალოგით. დღეს, პარტნიორების ამ მოწოდებას რადიკალურმა ოპოზიციურმა ჯგუფებმა პოლიციასთან ქუჩაში ძალადობით და პროვოკაციებით უპასუხეს. "ქართული ოცნება" კი არის ის პოლიტიკური ძალა, რომელმაც ყველა მოლაპარაკებებში აჩვენა, რომ ის ასრულებს აღებულ პირობებს, ის ასრულებს ვალდებულებებს პასუხისმგებლიანად. ჩვენ მარტის შეთანხმებით საზოგადოებისთვის და ოპოზიციისთვის მიცემული ყველა პირობა შევასრულეთ რეფორმებთან დაკავშირებით და არჩევნებიც ახალი სისტემით ჩავატარეთ - ოპოზიციამ კი პირობა დაარღვია და საკუთარ მოთხოვნასაც არ დაუჭირა მხარი, სხვაზე რომ არ ვთქვათ", - განაცხადა თალაკვაძემ.
