"ევროპელი სოციალისტების" წევრის, დავით ზილფიმიანის განცხადებით, მათი ფრაქცია მიესალმება პრემიერ-მინისტრობის კანდიდატად ირაკლი ღარბიაშვილის წარდგენას.
ზილფიმიანის თქმით, მათი პარტია ძალიან კონსტრუქციული ოპოზიციაა და მხარს დაუჭერენ ირაკლი ღარიბაშვილის მთავრობას.
"ჩვენ ძალიან კონსტრუქციული ოპოზიცია ვართ და მხარს დავუჭერთ ირაკლი ღარიბაშვილს იმიტომ, რომ მისი პრემიერ-მინისტრად ყოფნის პერიოდში, ყველა დანარჩენ შემთხვევასთან შედარებით, ყველაზე ნაკლები კრიტიკა გვქონდა. ეს საკმარისი მიზეზია იმისთვის, რომ მხარი დავუჭიროთ. ირაკლი ღარიბაშვილმა იმ პერიოდშივე დაიწყო რეფორმირება. მისი ხელმძღვანელობით ხორციელდებოდა ძალიან ბევრი საწყისი. არ დაგავიწყდეთ, რა პერიოდია, როდესაც ყველამ ერთად ტირანია დავამთავრეთ და ამ კუთხით თანამებრძოლებიც კი ვიყავით. პირველი ნაბიჯების გადადგმა სწორედ მან დაიწყო. მის პერიოდშივე დაიწყო ის წარმატებული პროექტები, რომლებიც აღიარა სრულიად ევროპამ. მათ შორის მაგალითად, ციფრულ მაუწყებლობაზე გადასვლის პროექტი. ირაკლი ღარიბაშვილმა დაიწყო ამის აქტივაცია, რათა საქართველოს მიეღო სტატუსი, რომელიც ჩვენ ახლა ევროპასთან გვაქვს. ქვეყნის ტრანსფორმაცია ციფრულ მაუწყებლობაზე ერთ-ერთი აუცილებელი შემადგენელი ნაწილი იყო, რომ ჩვენ ევროკავშირის ასოცირებული წევრი გავმხდარიყავით", - განაცხადა დავით ზილფიმიანმა.
