90 წლის მარგარეტ ქენანი გახდა პირველი ადამიანი, რომელმაც დიდ ბრიტანეთში დღეს დაწყებული მასობრივი იმუნიზაციის პროგარმის ფარგლებში Pfizer-ის ვაქცინა გაიკეთა.
მარგარეტ ქენანმა, რომელიც მომდევნო კვირას 91 წლის გახდება, აღნიშნა, რომ ეს არის მისთვის დაბადების დღის საუკეთესო საჩუქარი.
"ძალიან პრივილეგირებულად ვგრძნობ თავს, რადგან პირველი ადამიანი ვარ, ვინც კორონავირუსის საწინააღმდეგო ვაქცინა მიიღო. ეს არის საუკეთესო საჩუქარი, რასაც ჩემთვის ვისურვებდი, რადგან ეს იმას ნიშნავს, რომ კვლავ შევძლებ მონატრებულ ოჯახის წევრებთან შეხვედრას", - თქვა მარგარეტ ქენანმა.
მან ასევე მოუწოდა მოსახლეობას, რომ გაიკეთონ ვაქცინა.
დიდი ბრიტანეთი მსოფლიოში პირველი ქვეყანაა, რომელმაც დაიწყო Pfizer-ის ვაქცინის გამოყენება მას შემდეგ, რაც რეგულატორებმა ის გასულ კვირას დაამტკიცეს.
შეგახსენებთ, გაერთიანებული სამეფოს ეროვნული ჯანდაცვის სამსახურმა დღეიდან დაიწყო კორონავირუსის საწინააღმდეგო მასობრივი ვაქცინაცია.
ვაქცინაციის პროგრამის პირველი ბენეფიციარები ხანდაზმულები და მზრუნველობით სახლებში მცხოვრები პირები იქნებიან.
დიდი ბრიტანეთის მარეგულირებელმა ორგანომ ამერიკული ფარმაცევტული კომპანია Pfizer-ისა და მისი გერმანული პარტნიორის BioNTech-ის ვაქცინა 2 დეკემბერს დაამტკიცა.
როგორც იუწყებიან ვაქცინის პირველი დოზები ბელგიიდან ბრიტანეთში უკვე ჩავიდა და შეიქმნა ვაქცინაციის 50 ცენტრი, რომელიც სხვადასხვა ჰოსპიტალში განთავსდა.
ბრიტანეთის ეროვნული ჯანდაცვის სამსახურის ინფორმაციით, კლინიკები 80 წელს გადაცილებული ადამიანების ვაქცინაციისთვის მოწვევას დაიწყებენ.
14 დეკემბრიდან კი ვაქცინაცია შედარებით უფრო ფართო მასშტაბებს მიიღებს.
შეგახსენებთ, Pfizer-მა და BioNTech-მა მათ მიერ შემუშავებული ვაქცინის დამტკიცების თხოვნით ევროპის სამედიცინო სააგენტოსაც (EMA) მიმართეს.
მანამდე ამ კომპანიებმა ვაქცინის დამტკიცების მოთხოვნა წარადგინეს აშშ-ის საკვების და მედიკამენტების ადმინისტრაციაში (FDA). ფედერალური უწყების დამოუკიდებელი ექსპერტები კლინიკური კვლევების შედეგების განსახილველად 10 დეკემბერს შეიკრიბებიან.
დადებითი პასუხის შემთხვევაში, ადმინისტრაცია და ინფრასტრუქტურა უკვე მომზადებულია იმისთვის, რომ ვაქცინის დამტკიცება და შემდეგ მისი დისტრიბუცია რამდენიმე დღის განმავლობაში მოხდეს. ვარაუდობენ, რომ ამერიკაში ვაქცინა უკვე 25 დეკემბრამდე იქნება ხელმისაწვდომი.
18 ნოემბერს Pfizer-მა და BioNTech-მა განაცხადეს, რომ მათ მიერ შემუშავებულმა ვაქცინამ 95%-იანი ეფექტურობა აჩვენა. გავრცელებული ინფორმაციით, 65 წელზე მეტი ასაკის მქონე ადამიანებში ვაქცინის ეფექტურობამ 94%-იან ნიშნულს გადააჭარბა.
ორი დღით ადრე (16 ნოემბერს), გავრცელდა ინფორმაცია, რომ ამერიკული ფარმაცევტული კორპორაცია Moderna-ს ვაქცინამ 94.5%-იანი ეფექტურობა აჩვენა.
Pfizer-ისა და BioNTech-ის მსგავსად, Moderna-მაც წარადგინა ვაქცინის დამტკიცების მოთხოვნა აშშ-ის საკვების და მედიკამენტების ადმინისტრაციასა და ევროპის სამედიცინო სააგენტოში.
ფოტო: AP
