საქართველოს რეგიონული თეატრების ქსელის მიერ „შემოქმედებითი საქართველოს“ მხარდაჭერით შეიქმნა ონლაინ პლატფორმა „რეგიონული თეატრების გზამკვლევი 2020“, რომელიც ერთ ინტერნეტ პორტალზე https://www.theatrelife.ge/regiontheatreingeorgiaguide აერთიანებს საქართველოს ყველა პროფესიულ სახელმწიფო რეგიონულ თეატრს.

ამიერიდან, ნებისმიერი დაინტერესებული პირისთვის ინტერნეტ სივრცეში ხელმისაწვდომია საქართველოს ყველა რეგიონულ თეატრზე შემდეგი ინფორმაცია: თეატრების მოკლე ისტორია, ინფორმაცია სათეატრო შენობებისა და რეპერტუარის შესახებ, დარბაზებისა და სცენების პარამეტრებისა და თეატრების ტექნიკური შესაძლებლობების (განათება-გახმოვანების რესურსების), მაყურებელთა დარბაზებში ადგილების რაოდენობის შესახებ და სხვა. რეგიონული თეატრების გზამკვლევი ორენოვანი (ქართულ-ინგლისური) გიდია საქართველოში არსებული რეგიონული პროფესიული თეატრების შესახებ, რომელიც მეგზურობას გაუწევს ქართული თეატრით დაინტერესებულ პროფესიონალებსა და მოყვარულებს.

პროექტის ფარგლებში სულ 25 პროფესიული თეატრის (მათ შორის, დრამატული, საოპერო და თოჯინური) მეგზური მომზადდა 7 განყოფილებისა და ვრცელი ფოტოგალერეის მიხედვით. რეგიონული თეატრების მეგზური განთავსებულია ვებპორტალზე www.theatrelife.ge და რეგიონული თეატრების ვებგვერდებზე.

პროექტი „რეგიონული თეატრების გზამკვლევი 2020“ განხორციელდა საქართველოს რეგიონული თეატრების ქსელის მიერ საქართველოს განათლების, მეცნიერების, კულტურისა და სპორტის სამინისტროსა და „შემოქმედებითი საქართველოს“ ფინანსური მხარდაჭერით კულტურის სექტორში შესაძლებლობების განვითარების და თავისუფალი პროექტების კონკურსის დარგლებში. პროექტის პარტნიორია თანამედროვე ქართული თეატრის კვლევის ცენტრი და ქართული თეატრის ელექტრონული არქივი.