ამერიკული გამოცემა New York Times-ის ცნობით, ევროკავშირში შემუშავდა საბოლოოს სია იმ ქვეყნებისა, რომელსაც 1-ლი ივლისიდან საზღვრებს გაუხსნიან.
გამოცემის ცნობით, სია მათ ანონიმურმა წყარომ მიაწოდა და მისი ოფიციალურად გამოქვეყნება მომავალ კვირაში იგეგმება.
სიის ფორმირებაზე ევროკავშირის ელჩები მუშაობენ. საბოლოო დასტური ევროკავშირის წევრმა სახელმწიფოებმა უნდა გასცენ, თუმცა სიას იურიდიული ვალდებულება არ იქნება და ის სარეკომენდაციო ხასიათისაა.
New York Times-ის მიერ მოპოვებულ სიაში სულ 18 ქვეყანაა მათ შორის საქართველო. ეს ქვეყნებია:
ალჟირი, ავსტრალია, კანადა, საქართველო, იაპონია, მონტენეგრო, მაროკო, ახალი ზელანდია, რუანდა, სერბეთი, სამხრეთ კორეა, ტაილანდი, ტუნისი, ურუგვაი, ანდორა, სან მარინო, მონაკო და ვატიკანი.
იუწყებიან, რომ სია პერიოდულად განახლდება ეპიდემიოლოგიური ვითარების გათვალისწინებით.
აღსანიშნავია, რომ სიაში არ შედის რუსეთი და შეერთებული შტატები. თუმცა შედის ჩინეთი, მხოლოდ ერთი პირობით, ჩინეთმაც იგივე ნაბიჯი უნდა გადადგას.
მანამდე Euronews-მა გაავრცელა ინფორმაცია, რომ ევროკომისიამ მოამზადა პირველად სია, სადაც 47 ქვეყანა, მათ შორის საქართველოც შედიოდა.
შეგახსენებთ, დღეს, საქართველომ რეგულარულ ფრენებზე დაშვება უკვე მეოთხედ, 1-ელ აგვისტომდე გადაავადა.
როგორც ცნობილია, ტურიზმის ამოქმედების ანტიკრიზისული გეგმის მიხედვით, უსაფრთხო დერეფნების შესაბამისად, საჰაერო მიმოსვლის და საერთაშორისო ტურიზმის გახსნა მთავრობის მიერ, 1-ელი ივლისიდან დაანონსდა.